admin
YiNtatheli kaMthunywa
UMSEBENZI wokuba ngumqeqetshi weqembu lebhola abanye bawuthatha njengeminye elomlandu omkhulu, okubonakala sikhathi sonke nxa abalandeli sebekhangelele impumela enhle.
Lokho kubonakala kumsebenzi wabaqeqetshi abatsha beHighlanders uCosmas “Tsano” Zulu, uAmin Soma Phiri loMelusi Mabaleka Sibanda.
UTsano uphenduka kuBosso ekusikhundla sakhe sokuba yinhloko yabaqeqetshi. Useke wavuka leqembu leli mhla eqhatshwa ukuthi angenele indawo kaKelvin Kaindu ngesizini edluleyo.
Kuliviki uMthunywa uxhumane loZulu, odume ngelithi Tsano kulabo abathanda inguqu, obike ukuthi angeke akhulume okunengi engakangeni enkundleni.
“Akula engingakutsho. Asilindeni umdlalo wangempelaviki, yikho lapho engizavula khona umlomo.”
IHighlanders idlala leHarare City ngoMgqibelo enkundleni yeRufaro. Lokho kutsho ukuba umdlalo lo yiwo ozafaka uTsano labanye bakhe uSoma Phiri loSibanda emehlweni abantu.
Kuwo wonke amathimu, laba bobathathu batsha kuligi yeCastle PSL yalonyaka.
Ukuba yinkunzi etshaya amaphiko okwenziwa nguZulu kutsho ukuthi nguye njalo ozibekela okumele kuzuzwe liqembu.
Loba engafuni ukukhuluma anduba kudlalwe, kusegcekeni ukuthi akakhangelelanga okunengi ngaphandle kokugcina iqembu lakhe lidlalela esigabeni esiphezulu kulogu.
Ngemva kokuqhatshwa kakutsha yiBosso, abaqeqetshi bobathathu laba bebechachamba ebusweni ngenjabulo.
Umaqhuzu weHighlanders uNdumiso Gumede ubike ukuba uZulu labasekeli bakhe baphiwe umlandu wokunqoba kumidlalo eyisithupha kuphela. Iligi yeCastle PSL isalelwe yimidlalo eyisitshiya galolunye.
“Kumele sidlale kahle kakhulu. Sikunguqu ukuzothola imiklomelo phela. Sifuna ukubabamba ngokuhlasela okunzima. Sikwenzile lokho kweminye kodwa sayeka amathuba okuhlohla. Abaqeqetshi abatsha bayazi ukuthi baqhatshelwe ukuthi banqobe,” kutsho uGumede ebikela uMthunywa.
Imidlalo yeligi yeCastle Lager kulimpelaviki:
NgoMgqibelo: Harare City FC v Highlanders (Rufaro), Chicken Inn v ZPC Kariba ( Luveve), FC Platinum v Dynamos (Mandava), Flame Lily v Hwange (Lafarge).
NgeSonto: Whawha v Triangle United (Ascot), Dongo Sawmill FC v Chapungu (Vengere), Caps United FC v Buffaloes (National Sports Stadium),Tsholotsho v How Mine (White City).
Online Reporter