Online Reporter
Abel Ndooka
MUIMBI wenziyo dzechitendero – Apostle Tichaona Tasara – orwisa kutorwa kwezvinodhaka nevechidiki uye nekuvakurudzira kuti vave nehunhu hunoyemurika kuburikidza nekambo kake katsva kaakabura kanonzi ‘Temberi YaJehovha’.
Pakambo aka, Apostle Tasara akabatana nevamwe vaimbi vanoti Bishop Norest Matende naBishop Samson Tavengwa.
Kambo aka kanokuridzira vechidiki kuti vachengetedze miviri yavo uye vasiyane nekatsika kekushandisa zvinodhaka.
“Ndakabatana nevaimbi vaviri vanoti Bishop Norest Matende naBishop Samson Tavengwa kubura kambo kangu katsva aka kanonzi ‘Temberi YaJehovha'”.
“Takaona zvakanaka kuti tibatane kuparidza neizwi rimwe chete tichipa dzidziso kune vechidiki neveruzhinji pamusoro pehuyipi hwekutorwa kwezvinodhaka uye kutengesa miviri nekuti miviri yedu yakakosha zvikuru.
“Bhaibheri rinoti Mwari vakasika munhu nemufananidzo wavo naizvozvo miviri yedu itemberi yaMwari tinofanira kuikoshesa,” anodaro.
Apostle Tasara anonyanya kuzivikanwa nenziyo dzakaita mukurumbira dzinosanganisira ‘Nguva Yekunamata’, ‘Tungamidza Mwari’, ‘Rovedzerai Vana’, ‘Pfuma Yekuromba’ uye ‘Chengetai Vabereki’.
