Online Reporter
Ethel Ncube
AMA-CARROTS yisilimo esingahluphiyo esilinywa umnyaka uze uphele kukanti-ke langesikhathi somqando ayalimeka.
UNkosazana Sazini Ndlovu onguAgritex Officer uveze ukuba abalimi bangalima ama-carrots ngoba kawahluphi njalo elizweni ayafunakala kakhulu, imakethe yawo ikhona.
Ubike ukuba abalimi ukuze babelesivuno esiqondileyo kumele balandele izimiso ezithile.
“Nxa uhlanyela ama-carrots kumele ubone ukuba umhlabathi kanye lemibheda yakho ilungisiwe kuhle. Inhlabathi yakho kumele ibele -ph engange 5.5 kusiya ku-6.5. Nxa ubumunyu bungafiki lapho kunombolo eziqanjiweyo kuyamele ufake i-lime ukuze ubumunyu bakho bufike kunombolo eziqanjiweyo. Ekuhlanyeleni kumele utshone nge-quarter inch kusiya ku-half inch kuthi i-spacing kube yi-3 inches,” kubika unkszn Ndlovu
Ubuye waveza ukuba ama-carrots afuna amanzi.
“Usuhlanyele kumele ubone ukuba uyathelela okuzwayo isilimo sakho singasweli manzi kuthi labo abalima ngokuthelezela kumele basebenzise imihlobo yokuthelezelela, le pivot kumbe micro jet irrigation kumele ithelezele kusale kumanzi enhlabathini. Umvundiso okumele uwufake yi-compound D, ufaka i-100-200kg kuhekitha eyodwa kuthi umqhuba kungafakwa 10 000-20 000kg kuhekitha eyodwa ukuze umhlabathi wakho unone. Ama-carrots avunwa ngemva kwamalanga angu-70 kusiya ku-120 ehlanyelwe, nxa suvuna usebenzisa i-garden fork ukuze uwavune kuhle, uwagezise uwahambise emakethe. Abafisa ukuwalima khathesi ngesikhathi somqando walimeni ayavuma,” kuphetha uNksz Ndlovu.
