admin
CHIKORO cheB & P Study Centre, icho chiri kwaSeke, nemusi weMugovera wadarika chakaita dopiro revaimbi vane mukurumbira nedozvo rekuunganidza mari yemabasa anosanganisira kuvandudza zvivakwa.
Vaimbi vaive pachiitiko ichi vanosanganisira Suluman Chimbetu, Tocky Vibes, Pastor Charles Charamba nemudzimai wavo Mai Olivia Charamba.
Anoona nezvekufambiswa kwemabasa pachikoro ichi, VaElias Mhandu, vanotenda zvikuru rutsigiro rwavakapihwa nevabereki uye vaimbi izvo zvakaita kuti vawane chimwe chechikamu chemari yevari kutsvaga.
“Tinofara zvikuru nekuti takawanisa mari yekuvaka horo yechikoro. Sezvamunoziva kuti tiri kuvaka bhodhingi, saka horo iyi ichashandiswa kudyirwa nevana uye vabereki vari munharaunda vanogona kuuya vachiita mitambo yakasiyana semabiko, michato kana kunamatira zvichibatsira chikoro,” vanodaro.
B and P Study Centre ine zvimwe zvikoro zvinosanganisira puraimari iri kuChitungwiza nesekondari iri kuNew Zengeza 4.
Mukuru wechikoro chekwaSeke, VaGodwin Mavurayi, vanoti vane shungu dzekuti chinge chichisimukira zvichifambirana nechirongwa cheHurumende chekuvandudza upfumi hwenyika, cheZim-Asset.
“Dingindira redu rine donzvo rinocherechedza zvirongwa zveZim-Asset kuti tive vanhu vasingangomiriri kupemha asi vanozvishandira. Chinangwa chedu ndechekusimudzira chikoro. Dingindira redu rinoti, ‘Chidhinha chako, chidhinha changu. Kana tikabatana tinovaka mudhuri’,” vanodaro.
Online Reporter