adminCornelius Luphahla
BAKHALA ezimathonsi abesilisa besigabeni seDlawa, eNkayi ngenxa yenina lakule indawo elingumazakhela okubikwa selibaqedile ngokulala labo lisebenzisa umbobobo.
Inina leli kucatshangelwa ukuba nguNkosazana Alice Nkosi osokudale ukuthi izakhamizi zithi kalisuke kulesisigaba ngoba lenza into engalunganga, uMthunywa uyakuveza lokhu lamhlanje.
UMthunywa ukhulumisane loMnumzana Kind Mabhena oveze ukuthi bathwele gadalala ngenina leli njalo libonakala nxa seliqedile seliphuma.
“Sithwele amagabha avuzayo ngoMaNkosi ngoba wonke amadoda alapha esigabeni avuka ekhuluma ngaye kuphela.
Nxa efika kawumboni uphupha ulele lowesifazana uthi nxa uphaphama umbone ephuma emnyango atshiye engavalanga.
“Okungimangalisayo yikuthi kungani engazidingeli indoda kulokuthi asebenzise umuthi wakhe lo osusiqedile,” kutsho uMnu Mabhena.
UMnumzana Thokozani Ngwenya ubikele intatheli ukuthi ngesikhathi bengakananzeleli ukuthi linina leli elilala labo babengasazwani labomkabo bebacabangela ukuthi balabomakhwapheni.
“Mina ngesikhathi umama lo esanda kuqala ukuganga kwakhe ngangingasazwani lomkami ethi ngilabomakhwapheni. Ngithe ngibona ukuthi into le iyaqhubeka ngabikela amanye amadoda angomakhelwane athi lawo awasezwani labomkabo ngenxa yalo umama.
“Ngemva kwalokho-ke saqala ukuzwana lomkami ngoba indaba le sahle sayibika lakusobhuku yakhulunywa kodwa kwaba nzima ukuthi simqambe umama lo njengoba engazake abanjwe,” kutsho uMnu Ngwenya.
Esinye isakhamuzi sakule indawo esithande ukuvezwa ngokuthi nguMaDube sithe uMaNkosi wake wasitshela ukuthi ulombobobo awuthatha eBinga.
“Mina ngiyakwazi ukuthi uMaNkosi ulombobobo wangitshela wathi wawuthatha eBinga kumalumekazi wakhe.
Watsho njalo ukuthi akulandoda angazake alale layo lapha.
“Wathi engangena endlini elowesilisa lonke liyahle lilale ubuthongo obukhulu enze akufunayo aze aqede beseliphaphama sephumile. Kwaba yinhlanhla nje ngoba umkami sowabhubha ngabe ukhona sasizahle silwe khonapho,” kuveza uNkszn Dube.
Usobhuku wakule indawo uMnumzana Danisa Ncube ebuzwa ngale indaba uvumile ukuthi uyayazi wathi basayihluzisisa ukuze bathole iqiniso ngayo.
“Indaba yenina okucatshangelwa ukuthi yilo elilala labesilisa lisebenzisa umbobobo ngiyayazi njalo lami ngiyake ngiphuphe ngilele lowesifazana engingamaziyo ngivuke umnyango suvulekile,” kutsho uMnu Ncube.
Ebuzwa ngale indaba uNkszn Nkosi uthe kakwazi lokho wacitsha umakhalekhukhwini wakhe.
“Indaba enjalo kangiyazi mina lingasangifoneli sengicitsha umakhalekhukhwini wami,” kuphetha uNkszn Nkosi.
Online Reporter