Online Reporter
Nkosilathi Sibanda
IDOLOBHO lakoBulawayo liphakathu kosizi kulandela ukwedlula emhlabeni kuka somabhizimusi odumileyo njalo owayengukhansila koBulawayo, u-Alderman Mohamed Hassen Esat.
Udlule emhlabeni ngeSonto eleminyaka engu-80 yokuzalwa, kulandela ukugula okwabangelwa yi-stroke.
UEsat ukhunjulwa njengomuntu obethobekile, olesihawu njalo ubengomunye walabo abahlonitshwa ngokuba lesandla ekuthuthukiseni idolobho lakkBulawayo ngokuvula amabhizimusi, umsebenzi kaHulumende lokuphathisa abaswelayo.
Wake waba ngukhansila emela ibandla leZanu-PF njalo waba ngomunye wabantu ababelwisa ukuthi iphurojekithi yeLake Gwayi-Shangani iqalise ukuze iqede uhlupho lwamanzi koBulawayo laseMatabeleland.
Ngaphandle kwezombusazwe, ubengumqondisi webhizimusi lemuli, iHM Esat and Sons, eyaziwa kakhulu ngokuthi yi-Esats Stores. Ibhizimusi leli selileminyaka edlula ikhulu likhona koBulawayo njalo liqhubeka lisiba phakathi kwamabhizimusi amadala njalo adumileyo edolobheni.
Ngomnyaka ka-2022 wanikwa umvuzo weZimbabwe National Chamber of Commerce (ZNCC) Lifetime Achievement Award ngenxa yomsebenzi wakhe omkhulu ekuthuthukiseni ibhizimusi lomphakathi.
Ekhuluma emele imuli, indodana yakhe uHassen Mohammed Esat uthe lanxa belusizi ngokufa kukayise, babonga impilo enhle ayiphilileyo.
“Ubaba wethu watshaywa yi-stroke emavikini adluleyo. Wabuye wopha engqondweni, samgijimisela esibhedlela.”
Uthe uyise wayengesabi lutho njalo wayengomunye wabantu abasekela impi yenkululeko.
“Ubaba wayeyindoda elwayo. Ngesikhathi abanye besuka, yena wasala eqhubeka esekela impi yenkululeko. Waphila eliqhawe njalo wafa eliqhawe,” kutsho uHassen.
Wengeze ngokuthi uyise wayebizwa ngelokudlala elithi “Mr Chronicle” ngenxa yothando ayelalo lokubala iphephandaba leChronicle nsuku zonke.
