Online Reporter
Ethel Ncube
IZAKHAMIZI zeLupane leBinga ezingaphansi kwenduna uMenyezwa seziveze ukukhathazeka kakhulu kulandela indlela amacala athethwa ngayo, ikakhulu awenkomo.
Izakhamizi ziveze ukuba zicabangela ukuthi kulobugwelegwele obukhona nxa amasela enkomo angatshontsha kulobufakazi umantshi uyala baphume ngebheyili.
Intatheli ixhumane lesinye isakhamuzi uMnumzana Joel Ndlovu oveze ukuba badinga usizo ikakhulu ngendaba zamacala enkomo.
“Enyangeni ezidluleyo sabamba umuntu etshontshe inkomo wazithengisa salandelela sazithatha sabamba lomunye owayesebenza labo sabahambisa lobufakazi emapholiseni kodwa indaba yaphelela emoyeni.
Sisebenza nzima siyizakhamizi sibamba amasela siwase emapholiseni, nxa sesiwabambile sebesemthethwandaba sebephuma.
Pho indaba yokutshontshelwa sizayenqabela njani nxa amasela engabotshwa? Sizafuya njani amasela eqeda izifuyo zethu? Kukhona okutshaya amanzi okungasonhlanzi phakathi kwamapholisa labomantshi lamasela,” kubika uMnu Ndlovu.
Omunye okhulume lentatheli ongathandanga ukuqanjwa ibizo ubike ukuba indaba le ayimphathi kuhle.
“Siyabamba amasela siwahambise emapholiseni kuhanjwe emthethwandaba, okulandelayo amacala aphelela emoyeni. Sifuna ukwazi ukuthi kambe kungabe kuhamba njani.
Abanye sabahambisa emthethwandaba weBinga baphuma, abanye baya eLupane lakho kuyafanana. Sihambisa umuntu emapholiseni sithwele ubufakazi kodwa kufika kwehlule kunjalo aphume.
Siyizakhamizi siyabe sisebenza gadalala silwisana lobusela kodwa kwehlule ekucineni,” kubika isakhamuzi.
Iphephandaba likazulu lixhumane lenduna uMenyezwa obike ukuba amasela ayaphuma awagwetshwa.
“Siyancedisana lezakhamizi sibambe amasela baqede emthethwandaba babakhuphe ngebheyili, asizwisisi ukuthi kuhamba njani. Nxa isela libanjiwe sihambisa konke lobufakazi kodwa kufika kwehlule siswele ukuba sazi ukuthi umthetho usebenza njani nxa bephuma bona belamacala,” kubika induna uMenyezwa.
