Online Reporter
KULODABA oluhlasimulisa umzimba olwenzakala kumngane wami esesemncinyane. Umngane wami bazalwa bebathathu; amantombazana amabili lomnewabo owayelizibulo yena elicinathunjana. Uyise wayengamazi ngoba wabhubha elomnyaka owodwa.
Wayembona ezithombeni labantu abazi uyise babethi lapho abahlangana laye bakhuze bababaze ngoba bethi wayemfuzile uyise. Abanye babethi bafanana okwamathendele ngoba akulula ukwehlukanisa olibone izolo kumbe ngeviki ephelileyo.
Eseqotshwana uyisemdala wathi azefunda ehlala kuye njalo lendleko zesikolo nguye owayezibhadala nanku lonina wayebafundisa ngemali ayeyithola angathengisa imithanyelo lembhida. Wakuthabela ethi umnewabo womkakhe usemethulela umthwalo wokufundisa nanku phela wayesefundisa ababili kuphela, kanti wayengabuzanga elangeni.
Uthi ngelinye ilanga evela esikolo uyisemdala wambizela ekamelweni lakhe lokulala wagijima njengengane eyayilomthetho wafika waguqa. Isimanga yikuba uyise omdala wambamba ngamandla wamfuqela embhedeni wamdlwengula kabili, wathi eqeda lapho wamnika iziwiji zohlobo lwethofi lezinye ezaziletshukela angani ngamakhekhe. Loba wayezithanda iziwiji kodwa ngaleyo mini kazange athande lokuzifaka emlonyeni wakhala ezimathonsi.
Uthi wafika walandisela unina kodwa bathi ulamanga uzama ukukhanda amacebo okuthi ekele isikolo. Besitsho la amazwi kuye uthi wabona impilo yakhe ifiphala.
Wazonda kodwa njengomntwana akukho ayengakwenza. Wayethi nxa emkhangela uyise omdala ahlengezele inyembezi abubule okwengane ehaqazwe yimbabazane.
Ngelinye ilanga lapho ezwa kuthiwa umdeni uzahlala phansi kukhulunywe ngokuhlupha imuli wathaba wabamanzi ecabanga ukuthi uzaphiwa ithuba lokuthi alandise ukuthi kwahamba njani, kwathi lalapho uyisekazi ezama ukuthi kukhulunywe ngaloludaba umdeni wavumelana ukuthi kuyazila ukuhlalisa inhloko yomuzi amadale funa lamadlozi abafulathele.
Wona umphakathi ubakhangele njani sebebophisana bengabemuli. Ngokudlula kweminyaka lenzondo kwathi lapho ekhula leqhubu lenzondo kuyisemdala lakhula wazitshela ukuthi ngelinye ilanga uyoqunga isibindi ayongena enkambeni amangale lomgulukudu onguyisemdala ubotshwe. Banengi abantu abazithola bekulesi isimo kuthulwe ngoba kuthiwa it’s cultural taboo ukuthi umntwana abophise uyise.
Ayixabene.
