Online Reporter
Ethel Ncube
ZIBAKHALELE izankosi abatholakale bethwele amasaka angu-17 embanje esehliswa ebhasini efakwa kwenye imota ngesikhathi ibhasi isifile emgwaqweni weHarare usiya eMasvingo.
Indaba le ivele ngeviki ephelileyo. Amapholisa kubikwa athola udletshana lokuba kulebhasi ethwele imbanje, okwenza abacuphi baphanga bayakuleyondawo bafica ibhasi ifile bayihlola bangatholi lutho.
Kuthe ngelanga elilandelayo kwabuya enye imota eyohlobo lweNissan yafika ebhasini le.
USpeakmore Mhonda oleminyaka engu-39 yokuzalwa waqala ukwethula amasaka ebhasini wawafaka emoteni kanti abacuphi laba babelokhu beyiqaphe ngawokhozi.
Basondela befuna ukubonisisa ukuthi kuyini, omunye uthe enanzelela ukuba abomthetho sebebabhacile wazama ukucela ezinyaweni.
Ngesikhathi becela ezinyaweni, uSpeakmore loLimbikani Mwanandi behluleka ukutshiya amapholisa, babanjwa babotshwa.
Kwatholakala amasaka angu-17 egcwele imbanje ezingaba yi-200kg ezibiza imali engange-US$21 000.
Ometheswacala bathathwa bahanjiswa enkambeni yamapholisa eseMasvingo kunye lamasaka abo embanje.
Isikhulumi samapholisa eMasvingo, u-Inspector Kudakwashe Dhewa ubike ukuba udaba olunjalo lusezandleni zamapholisa.
“Sithanda ukubonga umphakathi ngokusipha ulwazi olwasiphathisayo njengamapholisa ukuthi kubanjwe abantu abathengisa izidakamizwa. Siyakubonga ukusebenza kuhle kwethu lomphakathi njalo sithi asiqhubekeni sisebenza ndawonye siphathisana,” kuphetha uInsp Dhewa.
