adminEthel Ncube
ZISWELE imilomo ezinkulungwane izakhamizi zeNyamandlovu kulandela ukutholiswa impahla yokulima nguHulumende okuzakwenza umsebenzi wokulima ubelula.
Abalimi bekopa yeThembanini baphiwe incwadi zokuyathatha impahla le emahofisini eMhlahlandlela koBulawayo kunyanga ephelileyo.
Ikopa le elamalunga angu-30 ilendawo efika amahekitha angu-80 njalo balima izilimo ezitshiyeneyo bethelezela.
Intatheli ixhumane lomunye walunga e-irrigation le, uMnumzana Moffat Ndlovu othe bamanzi te ngenxa yesenzo abasenzelwe nguHulumende.
“Saphiwa impahla yokulima egoqela amakhuba, amathalakitha amabili, umtshina owodwa wokufakisa umquba, le-4 row planter kuvela kuHulumende ngaphansi kogatsha olubona ngama-irrigation. Impahla lezi zizaphungula umsebenzi ebesilawo, ikakhulu ekulimeni umumbu. Asisadingi abantu abanengi ngoba umsebenzi sumlutshwana,” kulandisa uMnu Ndlovu.
UMnu Ndlovu uqhubekele phambili echaza ukuba baphiwa ulwazi lokuthi impahla lezi zisetshenziswa njani kanye lokugcinwa kwazo.
“Kuviki ephelileyo besifundiswa ukuthi sigcine njani impahla lezi njalo labatshayeli bamathalakitha labo befundiswa ngokuphathwa lokutshayela kwawo.
“Siphinde njalo sakhetha ikhomithi ezakhangela ngempahla esiziphiweyo ukuthi igcinwe kuhle njalo isetshenziswa ngendlela efaneleyo,” kutsho uMnu Ndlovu.
Iphephandaba likazulu libuye lakhulumisana njalo lesinye isakhamuzi uMnumzana Lungisani Ndebele olima kukopa le yeThembani othe babonga kakhulu uHulumende ngomsebenzi abenzele wona.
“Siyathaba ngokuthola impahla le, khathesi asisahlupheki ukuthi kubelabantu abanengi bokuhlanyela ngoba sesilomtshina wethu wokuhlanyela. Impahla le izasincedisa ukuthi silime indawo enkulu ukuze silwise udubo lwendlala esabelweni sakithi,” kulandisa uMnu Ndebele.
UMthunywa ubuye wakhulumisana lomunye wabalimi bale i-irrigation uMnu Dalumuzi Moyo yena obike ukuba bazasebenza gadalala lonyaka.
“Sesilinde izulu kuphela ukuthi siqalise umsebenzi wethu njengoba konke sesilakho, lisina kuphela singena emasimini siqalise ukusebenza njalo sikhangelele ukuqhelisa indawo yethu njengoba sesilempahla yonke edingakalayo,” kuphetha uMnu Moyo.
Online Reporter