admin
Ethel Ncube
INHLANGANISO yeZimbabwe Farmers Union isikhuthaze abalimi ukuthi bangaweli nxa bethenga inhlanyelo kodwa kumele baqale badingisise babelolwazi ngayo ukuthi iyahambelana lesilinganiso sezulu elina esigabeni sabo.
Lokhu kubikwa yiyo kuphela indlela engabaphathisa ukuthi bathole isivuno esihle.
UMnumzana Abdul Nyathi ongumkhokheli weZFU ubikele uMthunywa ukuthi abalimi kumele nxa bethenga inhlanyelo bazi ukuthi ivuthwa nini njalo ifuna izulu elinganani ukuze batshaye inala.
Uthe ukwazi umhlobo wenhlabathi ngokunye kwalokho okuqakathekileyo okumele kwenziwe ngumlimi engakalimi njalo engakathengi lenhlanyelo.
“Abalimi basendaweni ezitshiyeneyo kungakho kumqoka ukuthi umlimi azi umumo womkhathi njalo lokuthi izulu lina njani engakathengi inhlanyelo yakhe.
“Inhlanyelo yomumbu ithengiswa ngamankampani atshiyeneyo njalo zilesivuno esihle kodwa kuya ngokuthi zithole amanzi anganani,” kutsho uMnu Nyathi.
Uqhubekele phambili echaza ukuthi indawo ezijayele ukuba lezulu elilutshwane abalimi kumele balime izilimo ezibalisa uphoko, amabele lenyawuthi ezingadingi izulu elinengi.
Ubuye njalo waveza ukuthi inhlanyelo yomumbu evuthwa masinya ngeyohlobo lwedube lenkawu.
“Inhlanyelo evuthwa masinyane ithatha inyanga ezimbili kusiya kwezintathu njalo ngeyomhlobo wedube, inkawu kanye lomvundla.
“Kungakho abalimi kumele babone ukuthi inhlanyelo abayithengayo yileyo emelana lokutshisa kwelanga kumbe ngithi ngelakho ukuvuthwa lanxa izulu lingaze lihambe,” kulandisa uMnu Nyathi.
UMnu Nyathi uphinde njalo wakhuthaza abalimi ukuthi bangalimi insimu yonke ngasikhathi sinye kodwa behlukanise ukuze nxa kusitsha kungatshi insimu yonke kodwa kube lendima ezisalayo.
UMnu Nyathi uphethe ngokucebisa abalimi ukuthi nxa besiyathenga inhlanyelo bafike bachasise kukhampani abathenga kiyo ukuthi bafuna enjani.
Online Reporter