Online Reporter
Ethel Ncube
KULENINA lomntanalo abathelele elinye balibhaxabula belisola ngokuthandana lomkalo okubangele ukuthi lisale lilimele kakubi esithweni sangasese, ekhanda, emlonyeni, emehlweni kanye lasemathangazini.
Abasolwa uMary Nyandoro (50) kanye lendodakazi yakhe, uEdline Kwangwa (23) abavela eChivi kubikwea bathelela uShara Midzo (48) ngogodo bambhaxabula isitho sangasese kanye lekhanda, bembambile bethi kavume ukuthi ulobudlelwano loTawanda Kwangwa.
Abasolwa bamiswe emthethwandaba ngeviki ephelileyo njalo bazaphindela futhi besiyathola isigwebo sabo.
Umtshutshisi uNkosazana Precious Takuva ubike ukuba abasolwa betheswa icala lokutshaya umamangala.
Kubikwa mhlaka 19 Mfumfu 2025 eRarizhou Irrigation abasolwa bahlangana lomamangala bamthelela bambhaxabula.
“UNyandoro loKwangwa bafika kuMidzo ngesikhathi esikha imibhida esivandeni, bemsola ngokuthandana lomkakhe. UMidzo wakuphika lokhu, kodwa uNyandoro waqala ukumtshaya ebusweni, wathatha ugodo wamtshaya ekhanda bethi kavume.
Baphinda bamtshaya esithweni sangasese kanye lasemathangazini ngogodo,” kutsho uTakuva.UMidzo wabaleka, wayabikela amapholisa waya lesibhedlela.
