Online Reporter
Ethel Ncube
IKHALA ezimathonsi enye imuli yeHope Fountain bucwadlana lakoBulawayo nanko phela ihlala itshiselwa impahla kunye lamayunifomu abantwana besikolo.
Indaba le isilamaviki isenzakala njalo imuli yakoMoyo isibone kungcono ukuthi igcinise abantwana komakhelwane ukuze bengatshelwa zimpahla. Nxa bephumile kuyatsha bathole kutshe ezinye impahla.
Intatheli ixhumane lesinye isakhamuzi ebesikhona emhlanganweni lapho obekukhulunywa ngendaba yomlilo.
“Imuli le ilohlupho njalo idinga usizo lwempahla zokugqoka lengubo kubangelwa yikuhlala itshelwa zimpahla. Okwenzakalayo bengavele baphume bahambe betshiye bengalayithanga lutho impahla eziphakathi ziyasala zisitsha kodwa i-wadrobe isale ingatshanga.
“Kungakho bekubizwe umhlangano ukuthi abantu baziswe ukuba kuzabuya umuntu esigabeni ezoncedisa ngokuthandaza lokuhlahlula ukuba imuli yakoMoyo yahlala itshelwa zimpahla kuyini okwenzakalayo. Ngikhuluma kunje sebelala phandle ngoba besesaba ukuba bazavuka betshele endlini ngelinye ilanga,” kulandisa isakhamuzi.
Ekhuluma lentatheli, omunye olilunga lemuli etshelwa zimpahla, uNkosazana Sikhumbuzo Moyo ubike ukuba bathwele nzima.
“Sileminyaka engu-20 sihlala lapha eHope Fountain okunje siyakuqala ukukubona. Into le yathi iqalisa yaqalisa kwelinye ilanga siphumile sathi sifika sathola impahla zitshile indlu ingatshanga sathi sikubonile. Kwaphinda futhi sathola kusitsha sazama ukucitsha nxa sicitsha kungacitsheki, sididene amakhanda ngembangela yomlilo lo.
“Kuthe ngelinye ilanga omunye wathi embathile ingubo elele yatsha yena wangatshi wabona kuphela sekutshile yena, lomlilo engazange awuzwe kumbe ukuzwa isikhudumezi, wabona kuphela sokutshile. Lapha sahle saqala ukusola ukuthi lokhu kwenzakala njani kukhona okutshisayo thina singakuboni.
“Umuntu ozabuya ezolungisa usetholakele kodwa kakafiki endaweni yethu simelele ukuba abuye ngeviki elizayo azokutsho ukuthi kuhamba njani. Abenelisayo sicela lisisize ngempahla loba yini siyathatha asiselazigqoko, ingubo angikhulumi, sacina siphiwa ngomakhelwane sesisele leyodwa eyatsha omunye eyembethe,” kuphetha uNkszn Moyo.
