Online Reporter
Thokozile Mbedzi
ZlLOKHE zitshwaqe imzimba izakhamizi zeHippo Valley eChiredzi kulandela ukuzwa ngamadoda amahlanu athelele enye indoda ayibhaxabula yaze yafa kulandela ukuyikhanda ihlinza imbuzi esibayeni somunye umakhelwane wabo.
Amadoda amahlanu la athi uWayne Makhosi (27), uDescent Munguni (26), uLivous Mushava (18), David Muwadzarira (24) lo Panashe Simbi (19) abahlala kuFarm 15 eHippo Valley basezandleni zamapholisa eChiredzi kulandela ukubotshwa besolwa ngecala lokubulala uRutendo Ncube oleminyaka engu-30 yokuzalwa, weMakondo Extension khonale eChiredzi.
Kuvele ukuthi mhlaka 2 Mbimbitho ngehola lesihlanu ekuseni, uRutendo Ncube lomunye wakhe osadingwa, bangena esibayeni sembuzi sikaTanyaradzwa Mari laye ohlala epulazini elifanayo bafika babulala imbuzi eyodwa.
Kubikwa ababili laba babonwa ngomunye ohlala epulazini leli owaphanga wayatshela abahlanu abetheswa icala lokubulala.
Kubikwa abetheswacala bagijima baqonda esibayeni bafica ababili laba belokhu bephathekile ngokuhlinza imbuzi bathe bebabona bacela ezinyaweni kodwa ngokuswelakala kwenhlanhla uNcube wawela egodini lokudla kwezifuyo.
Lo ayelaye kazange ame waqhubeka wabaleka, uNcube bambamba baqala ukumtshaya umzimba wonke ngezibhakela, bemkhaba abanye njalo besebenzisa lenswazi, okwabangela ukuthi acine equleka.
Abetheswacala laba benanzelela ukuthi sequlekile bazama ukuba bamenze iFirst Aid kodwa kwehlula.
Isikhulumi samapholisa esabelweni seMasvingo, u-lnspector Kudakwashe Dewa uthe abasolwa bahle babotshwa.
“Sibophe amadoda amahlanu ahlasele eyinye ngemva kokuyifica ihlinza imbuzi esibayeni somunye umakhelwane wabo.
“Undoda lo bamtshaya waze waquleka ngokusweleka kwenhlanhla wasesifa loba bazama ukumncedisa ngosizo lokuqala,” kutsho uInsp Dewa.
“Sikhuthaza uzulu ukuthi nxa ethe wabamba abantu abadale amacala babase emapholiseni kulokuthi bafake umthetho ezandleni zabo,” kuphetha uInsp Dewa.
