Online Reporter
Innocent Kurira
UMONGAMELI weZifa, uNqobile Magwizi, usebike ukuba basuthisekile ngokwamukelwa kuhle kwekhomithi yabo kumihlangano ebiqhutshwa ezabelweni zelizwe.
Iqula lenkokheli zeZifa ezikhokhelwa nguMagwizi ziphakathi kohlelo lokuhlangana lezinye ingatsha zomdlalo wenguqu kuleli ezabelweni, ngenhloso yokudinga amaqhinga okuvuselela umdlalo lokuhlanganisa amakhanda kungqubekela phambili yomdlalo. Lokhu kuza ngemva kweminyaka ibhola lakuleli lisalele emuva.
UMagwizi lequla lakhe bangene ezikhundleni ngoZibandlela njalo bakhangelelwe ukuthi bakhokhele linhlanganiso okweminyaka emine elandelayo.
Ingatsha zenguqu koBulawayo zinxuswe emhlanganweni yiZifa ngempelaviki edluleyo. Imihlangano le iqale ngoLwesihlanu ngeviki edluleyo eHarare, kwalandela enkabazwe edolobheni leGweru, Bulawayo laseMasvingo.
UMagwizi uthe yena lequla lakhe bakhululekile ukwamukela imibono emihle ezalungisa okwakonakele emdlalweni njalo bafuna ukuthi kube lokukhulumisana, ukwazisana lokwethembana.
Kuzo zonke lezi ingxoxo, uMagwizi ubelokhu esethula inhlelo zabo ezihlose ukuqondisa bonke ababambe intambo kunguqu yakuleli. Wethule njalo lendlela abayibona icacile lengqubekela phambili.
“Ukuxoxisana kwethu lengatsha zomdlalo bekukuhle. Abantu bayazi ukuthi yini okumele ilungiswe kubhola lethu. Kubukeka sengathi kulendlela ecacileyo mayelana lokuthi ibhola lethu kumele lihambe njani.
“Sekumele sivumelane ngokuthi yiwaphi amaqhinga esingawasebenzisa ukuze siqinisekise ukuthi ibhola lethu lithatha yiphi indlela. Ngijabulile ngengxoxo esibe lazo. Ngizizwa ngithobekile ngokuzimisela losekelo esiluthole kungatsha zomdlalo emihlanganweni yethu. Ukukhulumisana kuzaqhubeka phakathi kwethu lalabo esisebenzisana labo,” kutsho uMagwizi
Ingxoxo eziqhutshwa yiZifa zihlose njalo ukuthi zisondeze
ibhodi entsha yeZifa ilomongameli uMagwizi, abasekeli bakhe ababili uKennedy Ndebele loLoveness Mukura, lamalunga uKudzai Kadzombe, Alice Zeure, Tafadzwa Benza, Thomas Marambanyika, Brighton Ushendibaba, loDavison Muchena.
Kuzakhethwa amanye amalunga amabili kuPremier Soccer League laku-Zimbabwe Women’s Football League.
