admin
ENKUNDLENI kaDivision One kuqhinqwa isililo ngokuthi iqembu leBulawayo City kukhanya selibaleka lemiklomelo yonke libhekise kunguqu ezwayo eyePSL ngomnyaka ozayo.
Ngokudlala kwethimu yeBulawayo City, kubikwa amakhansila kamanisipala wakontuthu asethembise ukuthi uzaphosela imali kubadlali nxa bengaphumelela ukuya kuligi yePSL.
Abafakazi abaqotho abakukomithi eqhuba inhlelo zeBulawayo City bancwebe intatheli le indlebe ukuthi sekulemali esibekwe eceleni ezakuya emabhanga abadlali.
UMthunywa waba ngowokuqala ngoNhlangula ukubika ukuba amakhansila akoBulawayo, kanye laye usodolobho bazimisele ukuthi bazikhame ngokufaka imali ethile kubhajethi yedolobho ezancedisa ukuthi iBulawayo City idlalele ukuya phezulu.
Ngokunjalo, kukhangelelwe ukuthi ithimu le eqeqetshwa nguPhilani “Beefy” Ncube isidlalela ukuthi ivule isikhala esingeke savaleka.
“Abafana laba (Bulawayo City) balenhlanhla enkulu. Kulenkulumo ehlafunwa ngabadala bekhansili abathi ukudlala kwethimu yabo kuyabathabisa ngakho abadlali kumele baphiwe amasenti okubakhuthaza,” kutsho umfakazi osebenzela ithimu le.
Imizamo yokuxhumana loJerry Sibanda umgcinisihlalo weBulawayo City yehlule ngesikhathi sokuyadindwa kwephephandaba likazulu. Kodwa, labadlali balithimu bayafakaza ukuthi sebethenjiswe okukhulu nxa bengangena kuPSL.
Usodolobho wakoBulawayo uMartin Moyo ucele kuphela usekelo lwezakhamizi zonke ukuthi zilandele ithimu le ngoba yiyo ephethe ibizo ledolobho kwezemidlalo.
Isimo selogu siveza ukuthi Amakhosi asekhokhela ngemiklomelo eyisikhombisa. Abafana beBulawayo Chiefs bahlezi izithende kunombolo yesibili ngemiklomelo engu-52.
Loba iBulawayo City ifunga ukuthi izakhokhela ilogu iphenduke kuPSL, ngakolunye uhlangothi abafana beChiefs bayala lokhu, bathi ngeke kwenzeke lokho.
Umqeqetshi weBulawayo Chiefs, uThulani “Thuts” Sibanda ukhuluma ngokuthi bazayemuka iCity kumaviki alandelayo. Kusasele imidlalo emine kuphela ukuthi aphele uDivision 1.
“Sithe singena kuliligi le sathembisa abalandeli bethu ukuthi sizadlala njengalokhu esakwenza ngesizini edluleyo. Lokho yikho esikuqapheleyo.
“Abadlali sebezimisele ukuthi bebambe ziqine,” nguSibanda lo.
Umqeqetshi lo uthe loba belokuthaba ngokudlala abakwenzayo kulezinsuku, bayazi ukuthi ukuthi ukususa ithimu ephezulu akusoke kube lula.
Isimo selogu
P W D L F A Pts
1. Bulawayo City 26 18 5 3 35 6 59
2. Bulawayo Chiefs 26 15 7 4 40 11 52
3. ZPC Hwange 26 13 10 3 30 10 49
4. Technosphere 26 13 7 6 31 15 46
5. Casmyn 26 12 7 7 27 22 43
6. Makomo 26 12 6 8 24 21 42
7. Bantu Rovers** 26 12 5 9 28 16 41
8.Indlovu Iyanyathela 26 11 6 9 19 18 39
9.Black Boots 26 7 14 5 25 19 35
10.Amagagasi 26 8 10 8 19 20 34
11.Ntabazinduna 26 7 8 11 21 26 29
12.Trumus Warriors 26 5 10 11 14 20 25
13.Nust 26 4 12 10 15 24 24
14.Hwange U’20 26 4 8 14 14 32 20
15.Mpumalanga 26 3 3 20 11 45 12
16.Old Nic Mine 26 1 6 19 7 55 9
Online Reporter