adminUKWANDA kwemincintiswano yomdlalo wenguqu eFilabusi sekutshengise ukuba abantu abanengi sebephatheka kulumdlalo njalo inkokheli zakulindawo lazo sezincedisa ukuze kuphakanyiswe imidlalo le.
Osekusele yikuthi kuvunjululwe abafana lamantombazana abalethalenta elivuthayo abazakuba lethuba lokuyabonakala kumathimu esizwe.
Ngempelaviki edluleyo iphephandaba likazulu lingene umango weNsiza South lapho okubonakale umanyano wezakhamizi ekuvuseleleni inkundla zemidlalo ezibalisa inguqu, ezokuqaga le-volleyball.
Kuvulwe igceke lezemidlalo elitsha kulandela ukuncediswa nguSpare Sithole, usomabhizimusi ongumaqhuzu wenkampani yePara-Reserve Security eseFilabusi.
USithole unike amathimu ayisithupha amakhithi okudlala.
Phezulu kwalokhu, uSithole ubikele uMthunywa ukuthi nguye owancedisa ukuthi inkundla yeNceduluntu ivuke ngokufaka izinti, lokuphathisa ukucenta ihlahla.
“Ngincedise abantu bakulumanga we-Insiza South ngoba ngisazi ukuthi kukhona abakuswelayo, ikakhulu kwezemidlalo. Intsha yethu lapha akumelanga ihlalele amathalenta.
“Inkundla le esiyivula khathesi izakuba ngumzekeliso wokuthi abadala balesifiso sokuthi isigaba siphumelele kwezemidlalo,” kutsho uSithole.
Omunye umqeqetshi osakhulayo okhulume lephephandaba likazulu kuliviki, uPride Ncube, ubike ukuba abaphathi bakuleyondawo sebeqakathekisa imidlalo yenguqu ngokuncedisa ngemali yokuthi kuqhutshwe limidlalo.
“Lapha eNsiza South sibonga ubaba uSithole labanye ngosekelo asesinike lona ukuze siqhube imidlalo yethu yenguqu.
“Inguqu iyadlalwa lapha eFilabusi, eNsiza South silamathimu amanengi njalo adlalelwa ngabafanana esibakhulisayo khonapha ezigabeni zethu,” kutsho uNcube.
Kubikwa kulindawo kulamathimu edlula alitshumi lambili adlala okukhanyayo njalo azimiseleyo lawo ukuthi azithuthukise ikakhulu kwezemidlalo yenguqu lokuqaga .
“Esikukhangeleleyo kuHulumende okwamanje yikuthi asiphathise ngokuthi sikhulise ezemidlalo lapha njalo asiphathise ngempahla zokugqoka ezifana lama-boots kanye lamabhola okukhaba,” kutsho uNcube.
Online Reporter