admin
Cornelius Luphahla
ZITHITHIBELE izakhamizi zeHope Fountain empumalanga yedolobho lakoBulawayo ngemva kokuba omunye umakorokoza ewele emgodini wegolide eCarry Mine wehlula ukukhitshwa nanko phela sokudlule insuku ezintathu elokhu engakakhutshwa, uMthunywa uyakuveza lokhu.
Isiga lesi senzakale ngoMvulo kuyonale iviki lapho uNkosinathi Nkala (33) awele khona emgodini weCarry Mine eHope Fountain egebha okungekho emthethweni wahle wafela phakathi.
UMthunywa uxhumane lesinye isakhamuzi sakule indawo uMnumzana Mlamuli Siziba oveze ukuthi umuyi kucatshangelwa ukuthi uwiselwe ngabomo emgodini.
“Umuyi kukhanya angathi wawiselwa ngabantu emgodini noma nje bengakuvezi lokhu, ngakho sokuze kudlule insuku ezintathu kusehlula ukuthi abe-sub-aqua unit bamkhuphe ngoba ecwile emanzini.
“Noma nje engakabonakali kodwa kuthiwa imvuthu zengwane yakhe yokugebha ayeyigqokile bayazibona zindenda phezulu kwamanzi,” kutsho uMnu Siziba.
UMthunywa wenelise njalo ukukhulumisana lesihlobo sikamuyi, uNkosazana Sibongile Moyo ochaze ukuthi abalamathe ngalesisiga esibehleleyo.
“Lokhu ngitshe amathe njalo kangilamazwi engingawatsho ngomonakalo lo. Isifiso sethu njengemuli yikuthi ngabe uNkulunkulu uyangenela laba abazama ukumkhipha benelise ukumkhipha kulokuthi alobele phansi,” kuchaza uNkszn Moyo.
Omunye walabo abazama ukumkhupha ongathandanga ukuqanjwa ngebizo uthe bakhangele ukuthi bazakhipha isidumbu sikamuyi lamuhla.
“Sikhangelele ukuthi lamuhla sizenelisa ukukhipha umuyi emgodini lo njengoba sesilamalanga sisehluleka ukumkhipha. Ngokubona kwami lamuhla engabe sendenda phezulu kwamanzi njengoba selesikhathi wawela,” kutsho isisebenzi lesi.
Isikhulumi samapholisa edolobheni lakoBulawayo uInspector Precious Simango uchaze ukuthi indaba le bebengakayizwa.
“Indaba le asikayamukeli ngakho sizayidingisisa sizwe ukuthi kuhambe njani,” kuphetha uInsp Simango.
Online Reporter