Online Reporter
Nkosilathi Sibanda
IDOLOBHO lakoBulawayo ngoMvulo beligcwele injabulo nanko inengi labantu liphume ngobunengi emigwaqweni ukuzonanza iBulawayo Day.
Umkhosi lo ubuthakazelela iminyaka engu-132 yalelidolobho.
Umkhosi uqale ngombukiso we-parade le-carnival emigwaqweni esenzikini yedolobho ngaphambi kokuthi abantu babuthane eLarge City Hall. UMhlonitshwa bekunguMphathintambo obona ngokwenzakala koBulawayo, uJudith Ncube.
Abafundi, osomabhizimusi, amaqembu emigido yesiNtu, amakhansila edolobho, amabutho esizwe samaNdebele, amatshitshi, inhlanganiso zomphakathi lezakhamizi jikelele zibe yingxenye yomkhosi lo obukhumbula usuku luka- 1
Nhlangula 1894 lapho uBulawayo abekwa ngokusemthethweni njengedolobho.
Abahlabeleli abatshiyeneyo lembongi, bavuthise inkundla yeLarge City Hall besamukela abantu lokutshengisa ubuciko kwezomculo lemigido yesiNtu.
UMphathintambo obona ngokwenzakala edolobheni lakoBulawayo, uJudith Ncube uncome izakhamizi ngokuphuma ngobunengi.
“UBulawayo ulembali ebanzi njalo eqakathekileyo elizweni. Imikhosi enjengale isikhumbuza lapho esivela khona njalo isikhuthaza ukuthi sisebenze ndawonye ukuze kube lentuthuko. Abantu bakoBulawayo bahlala besaziwa ngokusebenza nzima lokugcina amasiko abo,” kutsho uNcube
Ekhuluma emkhosini lo, uSodolobho wakoBulawayo, uDavid Coltart, uthe amandla lokukhula kwedolobho kusebantwini njalo kuqiniswa yimbali.
“Lamuhla sinanza ukuzimisela, ukubekezela lomoya wokubambana kwabantu bakoBulawayo. Lanxa sibhekane lenkinga ezitshiyeneyo, idolobho lethu liyaqhubeka limi liqinile ngenxa yokusebenza gadalala kwezakhamizi zalo. Kumele siqhubeke sisebenzisana ukwakha idolobho elizakwamukelwa lokuthokozelwa yizizukulwane ezizayo,” kutsho uColtart.
UMqondisi wogatsha lweHousing and Community Services kukhansili yakoBulawayo uDictor Khumalo, uthe ukuphuma ngobunengi kwabantu kutshengise indlela izakhamizi ezilithanda ngayo idolobho lazo.
“Ukuphuma kwabantu ngobunengi kutshengisa ukuthi abantu bakoBulawayo bayaziqhenya ngedolobho labo. ICarnival lombukiso kuhlanganise abantu abavela kuzo zonke indawo njalo kwatshengisa ukutshiyana kwamasiko atholakala lapha,” kutsho uKhumalo.
Uthe ikhansili iphakathi kokuvuselela indawo zomphakathi emalokitshini ezifana lamaholu, ama-Youth centre lezinye, kuhloswe ukuthi kube zindawo eziphakamisa amasiko lokuphakamisa abantu.
UKhansila uMxolisi Mahlangu, uthe usuku lweBulawayo Day luqinisa ubudlelwano phakathi kwezakhamizi.
“Kuyajabulisa ukubona abantu bevela ezindaweni ezitshiyeneyo behlangana ndawonye bezonanza idolobho labo,” kutsho uMahlangu.
Omunye uKhansila u-Evans Netha uthe imbali yedolobho kumele iqhubeke ikhuthaza abantu ukuthi balivikele njalo balikhulise.
“UBulawayo yilifa elikhulu esaliphiwa ngabadala. Kumele siligcine njalo sisebenze ngokuzikhandla ukuze kube lentuthuko ephakamisa impilo zabantu.”
