Online Reporter
YiNtatheli kaMthunywa
IZIBUNGU azilunganga emibhideni kukanti inengi lazo zicina zibangela ukuthi amahlamvu ome.
Omunye umlimi wembhida uMnumzana Mandla Ndebele ubike ukuthi abalimi bemibhida kumele bafafaze imithi emibhideni yabo ukuze baqede izibungu lezo.
“Nxa ulesivande semibhida kumele imibhida yakho ifafazwe umuthi ukuze ivikelwe ezibungwini,” kuchaza uMnu Ndebele.
Uqhubekele phambili eveza ukuthi izibungu lezi ziyatshiyana ngoba kulezinye ezidla amhlamvu lezinye ezidla impande zemibhida ize iswabe.
Lokhu kucina kubangela ukuthi imbhida ingakhuli kuhle.
“Izibungu ezinengi zombhida ikakhulu ezidla amahlamvu ziyabe zilombala oluhlaza njengowombhida okubangela ukuthi kwesinye isikhathi umlimi engazinanzeleli.
“Izibungu lezi ezinye ziyabhoboza amahlamvu ezinye zidla impande zombhida ucine ungasakhuli ngakho ukufafaza isivande sakho kuqakathekile kakhulu,” kuchaza uMnu Ndebele.
Ubuye wathi ekufafazeni isivande sakho uyenelisa ukuthi uzithengele imithi yokufafaza uzenzele kumbe ubize abafafazayo e-Agro-Seeds and Chemicals bazokwenzela.
“Kulemithi eyehlukeneyo omunye wakhona yi-Diazinon oqeda izibungu lezi njalo umlimi ulakho ukuzithengela azenzele yedwa kumbe abize abafafazayo bazomfafazela,” kuphetha uMnu Ndebele.
