Online Reporter
Peter Matika
KULOMAMA ohlala eNjube koBulawayo ohlezi ephethe izibindi ngezandla njalo ongabuquthiyo ubuthongo ngemva kokuba abantwana bakhe ababili abancane kubikwa banyamalala besezandleni zikayise wabo ngeviki edluleyo.
Kubikwa indoda le yathumela umbiko owesabekayo ngeWhatsApp ibika ukuba ihlose ukuzibulala labantwana.
Ku-Angeline Ndlovu (38), kubuhlungu ukubona umzuzu ngamunye odlulayo engazwanga lutho ngabantwabakhe.
Isikhalazo sakhe esikhulu ngesithi: “Bisa abantwabami ekhaya bephila.”
Abantwana laba nguNkosana Smile Sibanda (5) lodadewabo uShauna Sibanda (10). Bobabili bahlala eNjube lonina.
Banyamalala ngoLwesihlanu olwedluleyo mhlaka 22 Nkwenkwezi ngemva kokuba behanjiswe kuyise, uSmile Sibanda (45) owePumula South.
Amapholisa athe abantwana laba bengabe besengozini enkulu.
Isikhulumi samapholisa koBulawayo, u-Inspector Nomalanga Msebele, uthe indaba le yaqala mhlaka 22 Nkwenkwezi ngehola lesihlanu ntambama lapho uyise wabantwana ahlangana lonina wabo eNjube Shops ecela ukuthatha abantwana ahambe labo ngmpelaviki.
“Umama wavuma wasebasa kuyise,” kutsho u-Insp Msebele.
Kodwa lokho okwakubonakala kuluhambo olujwayelekileyo kwaphenduka isimo esesabekayo.
Amapholisa athe ekuseni ngosuku olulandelayo, ngo-8:18AM, uSmile Sibanda wathumela umlayezo kunina wabantwana emtshela ukuthi akhangele imilayezo yakhe kuWhatsApp.
Lokho okwakukhona kwephula inhliziyo yakhe.
Amapholisa athe umama wabona ividiyo esabekayo etshengisa abantwana bebotshwe izandla lenyawo besendaweni efana lehlathi.
Kuthiwa umsolwa waphinda wathumela ilizwi elisabekayo emtshela ukuthi leso yisikhathi sokucina ebona abantwana bephila, wathi kumele enze amalungiselelo omngcwabo wakhe lababantwana.
Imilayezo eyesabekayo idale uvalo olukhulu emulini lezakhamizi.
Njengoba kuyisikhathi sokugodola, uAngeline uthe ukhathazekile kakhulu.
“Abantwana basesebancane kakhulu. Angazi ukuthi balala ngaphi, badlile yini kumbe baphephile yini,” kutsho u-Angeline.
Uthe uyise wabantwana wayevele esethumele imbiko yokusonga ebika ukuba uzabalimaza ngemva kokuba enqatshelwe ukuqhubeka lobudlelwano laye.
Manje isicelo sakhe esikhulu yikuthi abantwana babuyiswe ekhaya bephila.
Amapholisa aseqalise uphenyo, kuthi uyise wabantwana uthathwa njengometheswacala kulelicala.
UInsp Msebele ukhuthaze umphakathi ukuthi unikeze ulwazi olunganceda ukutholakala kwabantwana loyise.
“Lowo olemininingwane enganceda ekutholakaleni kwabantwana kumbe uyise angaxhumana leZRP Njube ku (0292) 412096 kumbe abike enkambeni yamapholisa eseduzane.”
