Online Reporter
YiNtatheli kaMthunywa
KULENDODA edingwa ngamapholisa ngemva kokwenza isehlakalo esethuse umphakathi eTsholotsho, esabelweni seMatabeleland North ngemva kokutshisa amalunga enye imuli njalo abanye bahlahlelwa ngamahloka.
U-Ephraim Ndlovu (Moyo), owaziwa njalo ngokuthi ngu “SasBhoido”, wesigabeni seMswigana kumbe Lukukwe Line eTsholotsho usolwa ngokuhlasela ngochuku amalunga amahlanu emuli yakoNdlovu.
Kubikwa amalunga la asesimeni esibi esibhedlela.
Kumbiko wamapholisa, umetheswacala kuthiwa wasebenzisa amafutha ephethulo lehloka kulokhu kuhlasela, okwabangela ukuthi abanye balimale kabuhlungu njalo balaliswe esibhedlela.
Kubikwa ukuthi phakathi kwabalimeleyo kulomkakhe okuthiwa watsha kakhulu emzimbeni, esinye isihlobo esalimalayo lomntwana.
Kusenjalo, omunye owesifazana okhulelweyo kubikwa ukuthi wasinda ngemva kokweqa ngefasitela ngesikhathi kuqhubeka udlakela lolu.
Isehlakalo lesi sitshiye umphakathi weTsholotsho wethukile njalo uzondile ngenxa yobudlova lobu.
Amapholisa axwayise uzulu ukuthi umsolwa lo uyingozi njalo acela loba ngubani ololwazi olungancedisa ekubotshweni kwakhe ukuthi ayebikela amapholisa aseduzane laye.
Icala leli lingaphansi kweTsholotsho Police Case Number 31-34/5/26.
