adminCornelius Luphahla
UZULU wakuleli ikakhulu omama labantwana abangamankazana, bakhuthazwa ukuba bananzelele ikakhulu omama labantwana abangamankazana ukuba bengalingi abesilisa ukuze bavikeleke ekubanjweni iganyavu osekubhahile kulezinsuku.
Lokhu kuvezwe ngezinye zenkonkeli zamapholisa akuleli ngoLwesine kuviki ephelileyo lapho obekuloMhlahlandlela wokusebenza kwamapholisa edolobheni lakoBulwayo eCity Hall lapho uzulu obeboniswa khona indlela angasebenza ngayo lamapholisa kanye lengavikela ngayo ukwanda kwamacala.
Ekhuluma kulo umkhosi uSomlomo wamapholisa koBulawayo uInspector Precious Simango uveze ukuthi abesifazana yibo abadala ukwanda kwamacala okubanjwa iganyavu.
“Bomama lingalingi amadoda ngokubatshiya labantwana abangamankazana ikakhulu abalobuhlobo obukhatshana ngoba isiphetho bazababamba iganyavu. Okunye njalo gqokisani kuhle abantwabenu bengahambi bevezela amadoda ubunqunu ngoba inengi labantwabenu lihamba nqunu, asazi ukuthi lithini ngakho.
“Imizwa yabesilisa iseduzane ngakho kuyenzeka ukuthi engabona ubunqunu lobu noma nje engazimiselanga ukubamba iganyavu ecine sekwenzile. Ngakho bomama lingafaki abesilisa ezilingweni,” kutsho uInspector uSimango.
Uqhubeke njalo wagcizelela ngokuthi abesifazana kubalulekile ukuthi bengahambi labesilisa enhlane bebabili ukuze bengabanjwa iganyavu.
“Ngiyalikhuthaza bomama ukuthi lingabohamba enhlane libabili lowesilisa ethi uyakukhulekela ngoba isiphetho uzakubamba iganyavu. Kungcono ukuthi ofisa ukuyakhulekelwa ahambe labanye, nxa ethi ufuna ukukukhulekela libabili wale,” kutsho uInsp uSimango.
Inkokheli lezi zibuye njalo zaveza ukuthi nxa sekukhona odinga usizo lwamapholisa kusasemasinya kafonele inombolo ezithi 110 ngeNetone kuthi oleEconet afonele ezithi 885479. Lokhu kufona kubikwa kwenziwa mahala kungadli ngitsho imali.
Online Reporter