adminNguCornelius Luphahla
IQEMBU leButho Lesizwe kalipheli mandla kwezomculo nanko phela selize likhangelele ukuthwala umculo walo liwuchaphise uNgulukudela liyewela kweleSouth Africa.
Njengoba kuthiwa inyathi ibuzwa kwabaphambili njalo amehlo madala kuyagcwaliseka lokhu nanku leliqembu elasungulwa ngomnyaka ka 1967 lokhu libheda kwezesitshikitsha, ezengquzu, leminye imigido yesintu njengoba lidume ngezesintu.
Leliqembu lilamalunga azingwevu ezilitshumi kazigidi nje zilomuntu phansi. UMlawuli waleliqembu uMnumzana Kenneth Mpofu ubikele intatheli ukuthi bona njengeqembu bahlose ukujabulisa abantu ngokuhlabelela kanye lokugida.
“Njengeqembu elidume ngokujabulisa abantu, sijonge ukubajabulisa ngokuhlabela yonke imihlobo yezingoma ezivuma imigido yesintu. Okunye njalo sijonge ukuthi abantu bakwazi ngempilo kanye lenhlalo yaboMandulo ngoba sitshaya zona ngokwazo ezesintwini ezikhumbuza ingwevu ngobutsha bazo.
“Yikho nje khathesi sikhangelele ukuyahlabela phetsheya kweleSouth Africa nxa kuthe kwabakhona osincedisayo ngemali yokuya khona,” kutsho uMnu Mpofu.
Ekhuluma loMthunywa uMnumzana Moses Moyo ubikele intatheli ukuba njengeqembu bandise ukuhlabela emidlalweni etshiyeneyo.
“Thina sandise ukuhlabela emidlalweni etshiyeneyo efana lamadili okuzalwa, emitshadweni, kanye lakweminye nje imikhosi etshiyeneyo. Ngikhuluma nje sesibhode indawo ezinengi kuleli sihamba ngokuhlabela ngoba abantu sebasazi ukuthi sibabonisa ukudla kwamehlo.
“Ekuhlabeleni kwethu iGwebu Brewery iyake isikhuphele amadlalade nxa sisemcintiswaneni lamanye amaqembu esicula lawo. Ngakho khathesi lathi sikhangelele ukukhipha elethu idlalade ukuze abantu bazizwele bengezwa ngelika bathi,” kutsho uMnu Moyo.
UMnu Samson Maphosa olilunga laleliqembu uchaze ukuthi ukhuthaza abahlabeleli abasacathulayo ukuba baqinisele.
“Abahlabeleli abasakhasa ngithi kababambelele emculweni ikakhulu abacula ezesintu ukuze amasiko ethu engatshabalali. Ngikhuthaza kakhulu ontanga ngoba yibo ibutho lesizwe sakusasa,” kuphetha uMnu Maphosa.
Online Reporter