Online Reporter
Muchikamu chino, vaverengi, vateveri veKwayedza nevamwe vanotsigira bepanhau iri vari kupihwa mukana wekubvunza zvimwe zvezvinhu zvinoshamisa, zvisinganzwisisiki nezvakasiyana-siyana zvinonetsa pachivanhu mumararamiro evanhu vatema uye vachipindurwa nenyanzvi.
Mubvunzo
Ndinoda kunzwisisa pamusoro penyaya yamusarapavana. Anoita basa rei uye akakosherei? — Mai S Chihwai, Goromonzi
Mhinduro
Musarapavana munhu, angave murume kana mukadzi, anosarudzwa nevehukama kuti atarire mhuri inenge yasiiwa nemushakabvu.
Kazhinji, pachivanhu, musarapavana uyu anosarudzwa kana kuti kudomwa musi unogovewa nhumbi nemidziyo yemufi.
Pakusarudzwa kwake, anogadzikwa parukukwe kana kuti rupasa apo anopembererwa, achipihwa zvipo zvinosanganisira mari nezvimwe nevana pamwe chete nehama dzemufi.
Pabasa rake, musarapavana anomira semubereki kumhuri inenge yasiiwa.
Muchidimbu, ndiye anobatsira nemazano nezvimwe.
Kana mhuri iine zvinetswa, anotarisirwa kunge achizvigadzirisa.
Asi mutemo hautenderi kuti musarapavana atorere mhuri yemushakabvu pfuma, midziyo nezvimwe zvavanenge vasiirwa nemubereki kana kuti vabereki.
Hongu, mazuva ano kune vamwe vanamusarapavana vave neundyire zvokuti vanogona kuomesera mhuri zvakadarikidza nenzira dzakasiyana-siyana asi maitiro akadai haana kunaka uye anenge asingatarisirwi.
Zvinokwanisika kuti musarapavana asandurwe, pagoiswa mumwe kana zvaonekwa uye paine umboo hwokuti ari kumbunyikidza zvakanyanya mhuri yakasiiwa nemushakabvu.
Ndinovimba Mai S Muzavazi nevamwe mabatsirika zvakanyanya nemhinduro iyi.
Kune zvavanoda kunzwisisa, nyorerai kuna Bvunza Godobori panhamba dzeWhatsApp dzinoti +263 0774 132 838.
