Chikoro charamba kupera

Kingstone Mapupu
BASA rekuvakwa kwechikoro chitsva cheNyamasanga Primary School, kwaShe Rusambo, kuRushinga, rinonzi rave kunonotswa zvichitevera kubiwa kunonzi kwakaitwa zvinhu zvekuvakisa nembavha. Chikoro ichi, icho chiri mumugwagwa unobva kuMakachi uchienda kuNyamatikiti nekuMazowe River Bridge, chinonzi chakatanga kuvakwa makore matanhatu akadarika, asi basa iri rikazomira zvichitevera kubiwa kwezvekuvakisa.

Mbavha dzinonzi dzakaba samende, marata, mahwindofurema nemagonhi acho nezvimwewo. Zvinhu izvi zvinonzi zvave nenguva zvabiwa.
Mumwe ari mukomiti yekuvakwa kwechikoro ichi, VaBezel Zviitwa (29), avo vari kuona nezvekupemhwa kwemari yebara iri, vanoti vari kutsvaga rubatsiro rwekuti basa rekuvaka chikoro ichi rifambire mberi.

“Takanyora matsamba kune vamwe vane mabhizimisi muno nekunhengo yedu yedare reNational Assembly, Cde Wonder Mashange avo vanomirira Rushinga, uye takangomirira mhinduro yavo,” vakadaro VaZviitwa.

Vanoti zvidhinha zvekuvakisa chikoro ichi zvakakanywa nevabereki uye vari kuita mushandirapamwe neHurumende.
Mumwe mugari wenzvimbo iyi, Mbuya Easther Kambudzi (80), vanoti vakafara apo basa rekuvaka chikoro ichi rakatanga.

“Zvikoro zviri kuno zvinosanganisira Makachi Primary nesekondari yacho koita Nyamatikiti Primary nesekondari izvo zviri kure nesu zvekuti tanga taita rombo rakanaka rekuti chikoro ichi chivakwe,” vakadaro.

“Takazongonzwa kuti zvinhu zvabiwa, ndipo pakabva paperera sarungano,” vakadaro.
Vanoti vana vemunzvimbo yavo vari kufamba nzendo dzemakiromita 15 kusvika 20 kuenda nekudzoka kuzvikoro zviri kure zvichizoita kuti vamwe vasiire dzidzo panzira.

Zvakadaro, Kwayedza haina kukwanisa kutaura naCde Mashange dakara pakudhindwa kwenyaya ino.