admin
MUTUMBI wemwana wemhuri inoshanda papurazi riri kuHeadlands, kuManicaland, uyo waigariswa pasi pemubhedha mushure mekunge vaufukunuriswa nemuridzi wepapurazi achiti pavakaviga mwana uyu hapakodzere sezvo ari mafuro emombe, wakazovigwa zvakare svondo rapera.
Nyaya iyi yaifanira kunge yakapinda mudare raMambo Makoni, VaSimbai Gogen Gwasira (51), neChishanu svondo rapera asi ndokuzoendeswa mberi ichinzi ichatongwa Chishanu chino sezvo muridzi wepurazi iri, Mai Simbarashe Sipiwe Chimonyo, vakange vari kunze kwenyika. Vabereki vemwana ane mutumbi wakafukunurwa muguva uyu ndiVaPeter Chakawora (30) nemudzimai wavo Mai Janet Chizunza (30). Mambo Makoni vanoti Mai Chimonyo vakatumira maneja wavo, Grant Hoffmayor, kudare ravo nemusi weChishanu wadarika sezvo ivo vakange vakaenda kuTanzania.
Vanoti vakazotuma madzishe avo maviri anoti Ishe Nyambiya, Mai Mary Nyambiya (63), naIshe Manyara, VaMupedziswa Manyara (74) kuti vaone kuti mapfupa emwana uyu avigwa zvakare izvo zvinova zvakaitwa.
“Dare harina kufambira mberi sezvo muridzi wepurazi uyo anopomerwa kuti ndiye akafukunura mutumbi wekasvava aka, Mai Chimonyo, akanga asipo apo ainzi akaenda kuTanzania. Maneja wake Grant Hoffmayor ndiye akauya akakumbira kuti dare ripfuudzire nyaya mberi takamirira muridzi wenyaya,” vanodaro Mambo Makoni.
“Zvakadaro, takazoti isu sedare tivige mwana apo Hoffmayor akazozvipira kutenga bhokisi rekuvigisa mwana nekudya kwevanhu vainge vakaungana nekutenga fuko nekuita zvimwe zvaidiwa panhamo iyi.”
Mutumbi wemwana uyu unonzi wakazovigwa pane rimwe purazi reCallman kana kuti Badley riri kwaRusape neMugovera wadarika zvichitevera chikumbiro chevabereki vake.
Online Reporter