admin
Abel Ndooka
MUIMBI ari kusimukira – Dedicated Musasa – anoti vaimbi neshasha dzemadhirama vanofanirwa kutora chikamu chikuru mukushambadza pamusoro pekurwisa chirwere cheCovid-19 uye vachipawo mucheredzo wakanaka kune veruzhinji.
Muhurukuro, Musasa anoti denda reCovid-19 richiriko uye hakuna anoziva kuti rinopera rinhi saka zvakakosha kuti chenjedzo yechirwere ichi irambe ichipihwa kuitira kuti veruzhinji vasavarairwe uye vagare vakazvidzivirira.
“Denda reCovid-19 richiriko, hakuna anoziva kuti richapera rinhi uye kuti mangwana akamira sei. Saka isu vari mune zvemimhanzi tinofanira kugara tichipa chenjedzo nguva dzose kune veruzhinji kuti ngavatevedzere mutemo, vapfeke mamasiki avo uye vachizora masanitizer.
“Vanhu vasaungane-ungane kuitira kuti zvisape mukana wekuti chirwere ichi chirambe chichipararira,” anodaro Musasa.
Muimbi wechidiki uyu ashanda nesimba munyaya dzemimhanzi izvo zvamuona achiburitsa madambarefu matatu emisambo yakasiyana gore rino.
Aparura dambarefu rechitendero rinonzi Chingwa Chehupenyu, reSungura – Dariro Hamuzakatipa – nereZim-dancehall rinonzi Chibvindibvindi.
Anoti mhanzi yake inobata mazera ose sezvo chinangwa chake chiri chekuparidza shoko raMwari achishandisa misambo yakasiyana.
“Ndinoimba misambo yakasiyana nekuti chinangwa changu kuparidzira kumazera ese, vakuru nevadiki. Kune vamwe vanofarira dzechitendero, koita veSungura neveZim-dancehall, saka kumunhu wose shoko rinotongosvika kwaari chete,” anodaro Musasa.
Online Reporter