admin
KUNENGE kune makuwerere svondo rino kunhandare yeRufaro Stadium, muguta reHarare apo Dynamos iri kusangana neNgezi Platinum mumutambo wePremier Soccer League. Svondo radarika, pakave nekusuwa kukuru zvichitevera kushaika kwakaita vatsigiri vanonwe veDynamos munjodzi yemumugwagwa apo vaienda kumutambo wechikwata ichi neChapungu United.
Chiitiko ichi chakakatyamadza nyika yose zvakaita kuti zvikwata zvose pamwe nemasangano akasiyana vabatane mukuchema nemhuri yeDynamos FC.
Maneja weDynamos, Richard Chihoro, anoti kushaika kwakaita vatsigiri vavo munjodzi iyi kwakavasuwisa zvikuru.
“Parizvino chikwata chedu chiri kubatsira kuti vashakabvu vose vavigwe zvakanaka,” anodaro Chihoro.
DeMbare inoda kusimudzira kubva payakasira svondo radarika apo yakakunda Chapungu United 2-1 nekukunda Ngezi Platinum svondo rino.
Bulawayo City vs Harare City
Moses ‘Bambo’ Chunga akatanga zvinonwisa mvura basa rake idzva apo akatungamira Harare City kukunda Ngezi Platinum svondo radarika.
Bambo akapihwa mutoro wekutungamira maSunshine City Boys kuti apedze ari muzvikwata zvitatu zvepamusoro mwaka uno, kana achida kuwedzerwa imwe kondirakiti kuchikwata ichi.
Asi, Bulawayo City — iyo yakapinda muPSL mwaka uno — iri kutamba nhabvu inodakadza. Pamitambo yayo mipfumbamwe yayatamba, yakwanisa kuhwina mitatu ndokuita mangange mishanu, ikakundwawo mumwe chete uye iri pamusoro peHarare City, Dynamos FC, Chicken Inn neHow Mine palog.
ZPC Kariba vs Tsholotsho
Sunday ‘Mhofu’ Chidzambwa paakapinda panyanga kuZPC Kariba akatanga nekumbotatarika asi iye zvino chikwata chake chapinda mugiya dzvuku chairo.
ZPC ndiyo yakaita yekutanga kukunda FC Platinum mushure mekunge chikwata ichi chatamba mitambo 28 chisina kumbokundwa izvo zvakatuma murairidzi weFC Patinum, Norman Mapeza, kuti arumbidze basa riri kubatwa naMhofu kuKariba achiti vagona kurwira mukombe gore rino.
Mutare City vs CAPS United
Kepe-kepe yakatadza kushandisa mukana wekukundwa kweFC Platinum neZPC Kariba kuti iende pamusoro pelog zvichitevera kuita mangange kwayakaita neTriangle United.
Svondo rino ine mukana wekugadzirisa payakakanganisa vhiki radarika apo ichasangana neMutare City.
Abel Ndooka
Online Reporter