adminnaTakudzwa Wonder Jr Kasimonje
Shoko harivhikwi
Chinovhikwa chibhakera
Kubatana kunounza
Humwechete nerugare
Ngatibatanei mune zvese
Tive nebudiriro nerugare
Rusununguko kusununguka munezvose.
Magariro
Upfumi
Dzidzo
Utano
Rusununguko kubatana
Tose ngatibatanei
Zvisinei nekusiyana
Pfungwa, makanda, zvimiro neupfumi
Haibudirire nyika
Neruvenge neundingoveni
Kubatana ndiyo nzira yega
Yakatambanuka
Isingawanikwi makata
Vatengesi imi
Zivai kuti nyika haitengeswi
Semadomasi pamusika
Ngatiti tana kuramba
Kupesaniswa nevapesanisi
Muvengi ngaashaye zano
Isu tiramba takabata
Sesvinga rehuni
- Takudzwa Wonder Jr Kasimonje ari muForm 3 paGoromonzi High School.
MAONERO:
Hazvina kana mubvunzo kuti nyanduri wedu anogona here kana kuti kwete! Apa pabatwa basa, uye pakaburitswa pfungwa huru kwazvo dzinotoda kuwedzerwa paNational School Pledge! Wagona Kasimonje. Matingindira ako, matingindira ekuvaka nekusimudzira nyika, uye nezera rako une pfungwa dzakadzama nekukosha kwazvo. Nyangwe tikatarisa zvinhu zvinokosheswa nerwiyo rwedu rwenyika, “national anthem,’ wazviburitsa munhetembo yako, asi nemutoo wako wega.
Asi musoro wenhetembo yako waita sekuti wanga usina chokwadi kuti uri kuda izwi ripi chairo. Kushandisa mazwi aya ari maviri sezvawaita uchiti, “Kubatana ngatibatane,” hakuzonyatsopa vaverengi chokwadi chekuti wanga uchida kusimuka here kana kugara, kunyanya kana usina kuzoisa nyora dzekutura befu kana kufema.
Waita zvimwe chete mundima yechipiri pawati, “Rusununguko kusununguka mune zvose.” Dai waisa comma pakati ‘parusununguko’ na ‘kusununguka’ zvaibva zvatibatsira chaizvo nekuti anoverenga haarasike.
Chii chaita kuti ndifarire nhetembo yako, tisiri kutarisa zvezviperengo nezvimiso netumwe tumhosho tudiki? Nhetembo yako haitambise mazwi ichitenderera kutaura twusina maturo.
Nhetembo yako inobva yangoti nemazwi mashoma ga, ga, ga. Uku ndiko kugona kunyora nhetembo, kwete zvekuswerowanza mashoko neruzha.
Wanga uchiti ukataura pfungwa, wanga usingaisiire panzira, asi uchibva waitevera kuti ibva yaita kuti nhetembo yako inyatsosunga tai nekupfeka bhachi.
Muenzaniso ndewekuti, wataura kuti “Shoko harivhikwi,” mumutsara unotevera ukabva watiudza kuti chinovhikwa chii. Apa wagona nekuti waratidza kukoshesa kwako shoko rinouya nenhetembo nebasa rako sanyanduri/semudzidzisi kubva kwekutanga. Uri kuratidza kuti kurwa tichishandisa nenhetembo imhando yekurwa kwakakosha.
Waramba wosimbisa dingindira rako rekubatana zvekuti ndazonakidzwa nekunyora kwako uchishandisa fananidzo sepatinonzwa uchitsiura vatengesi kuti nyika haitengeswe semadomasi pamusika.
Ichokwadi kuseka tinoseka nekuda kwemashandisirwo aitwa mutauro, asi chiripo chinhu chakakosha chiri kubatwa nanyanduri.
Ari kuti kune vatengesi nevamwe vanopesanisa — vanhu ivavo ngavachenjererwe. Izvi zvinoita sekuti nhetembo iyi iri kudaira rwiyo rwenyika paye panonzi, “Tiidzivirire kubva kumhandu dzese.”
Pasina zvapo zviperengo zvakakanganiswa pamwe chete nekumbokanganwa kuita “punctuation,” ndinokupa sando dzako!
Online Reporter