adminnaAudrey Hwande
Achiri pazera rako iri
Peter Ndlovu akaita mukurumbira,
Nekutamba nhabvu.
Uyuwo Mukudzei Mukombe
Arikudadisa nemimhanzi,
Inokodza moyo nepfungwa
Kozotiwo Mark Zucker burg
Akaita mashiripiti ekugadzira fesibhuku.
Zvino iwe hanzvanzi,
Tinokuziva chose,
Nokuirikidza zvikadubura;
Chimwe muchiuno
Chimwe muzvidya
Chimwe mumabvi
Asi chiiko nhai m´kanya?
Sekuru vakapfimba mbuya,
Nokuridza tyava padhibhi
Chenzira akatambirwa,
Noruzhinji paaive Jekanyika
Ake matumba akabvuta
Moyo yaSuku naSayi.
Asi iwe hanzvadzi yangu,
Paunopfuura,
Vamwe vanodambuka mbabvu nekuseka
Vamwe sevanoshopera vanodzungudza,
Vamwewo vanongotarisa kurutivi.
- Audrey Hwande ari muGrade 7A paTafadzwa Primary School, muRimuka, kuKadoma.
MAONERO:
Mupepeti VaShamba ndibatsireiwo kupa Audrey Hwande sando dzake!
Nhetembo yakarongeka zvinofadza iyi.
Inoraya pamwe chete nekunongedzera hupenzi nenzira inosetsa.
Ndanyanya kufarira kwainobva nako.
Inotanga nemusoro unonongedzera hupenzi, uye unoseka hunhu husingafadze.
Iko kungoti, “Kwiridzira zvikabudura hanzvadzi,” kunotaura kuti pane zvisina kumira zvakanaka pakuratidzika kwehanzvadzi iyi.
Kana tazopinda mukati menhetembo yacho tinoona kuti inotanga nekupa mienzaniso yevanhu chaivo vakaita mukurumbira nezvinhu zvakanaka.
Anotaura zvaPeter Ndlovu wenhabvu, oenda kunaJah Prayzah wekuimba asati ayambuka mhiri kumurume wechidiki akagadzira Facebook.
Izvi zvinoratidza kuti munyori akaita tsvakurudzo kuti anyatsoratidza hanzvadzi yake kuti kana ukarongeka unobudirira muhupenyu. Uzotarisa kuti zviperengo zvemazita evanhu wazvinyora zvakanaka here.
Apedza kutaura zvevamwe vakaita zvinhu zvinoyemurika, anoenda kunotaura zvembiri ine hanzvadzi yake.
Anozivikanwa nekuvirikidza zvikabudura.
Kana naiye abva adzokera kumutupo kuratidza kuti zviri kuitika zvapesana nezvaanotarisira muna bhudhi vake muyera soko, makwiramiti, mukanya.
Anobva anyatsoti, “Asi chiiko nhai M’kanya?”
Uyu mubvunzo wakanangana nekubatsira kudzora pfungwa dzaMakwiramiti dzave kurasika.
Pamwe vakashevedzwa nemutupo vangatirimuke.
Mundima yechina, nyanduri abva adzokera shure kunotsvaga zvimwe zvekuratidza hanzvadzi yake kuti hapana chinobuda mukuita chenzira anongojakaira nenyika. Ndafarira kushandisa enzaniso kunonwisa mvura panzi naAudrey, “Paunopfuura . . . vamwe sevanoshopera vanodzungudza.”
Unobva wanyatsoona mupfungwa dzako zvakajeka vanhu vachiratidza kushaya chekutaura nekuda kwehunhu hwemukomana ari kutaurwa.
Ndafarawo zvakare mundima yechipiri mashandisirwo aitwa mazwi ana /chi/ achibva aburitsa chinhu chinonakidza chapera nekubvunzwa kuti “asi chii.”
Wagona Audrey, ramba uchiverenga mabhuku nekunyora nhetembo nerondedzero nekuti ramangwana rako rakajeka.
Online Reporter