admin
Munyori weKwayedza
MUKURU anoona nezvekudzivirirwa kwezvirwere kubazi rezveutano nekurerwa kwakanaka kwevana, Dr Portia Manangazira, vanoti kana mwana achinge aine guvhudende anofanira kuendeswa kuchipatara kuti anoonekwa kuti harina njodzi here kuupenyu hwake.
“Mamwe makuvhu evana anogona kungokura pasina kana dambudziko, chakakosha kuti richekwe zvakanaka pakuzvarwa kwemwana uye richigara riine utano kuitira kuti risapinde utachiona hunokonzera zvirwere. Ndokusaka zvichinzi kana mwana achinge azvarwa mushure memazuva gumi anofanira kuenda kuchipatara, ndizvo zvimwe zvezvinhu zvinenge zviri kutariswa kuti guvhu rake rakaoma zvakanaka here kana kuti rakazvimba.
“Kana akaonekwa aine ‘hernia’ guvhu iroro rinovhiiwa kuti pagadziriswe uye zvinokurudzirwa kuti mwana avhiiwe achiri mudiki. ‘Hernia’ inobata vanasikana nevanakomana zvisinei nekuti huwandu hwacho huri kuvanakomana asi inorapika,” vanodaro Dr Manangazira.
Vanoshora dzimwe tsika dzinokanganisa utano hwevana apo vabereki vanotora mishonga isina hutsanana vachizora pamakuvhu evana zvichizoita kuti vapedzisire vave kurwara.
“Guvhu remwana rinofanira kugara rakachena uye rakavharwa nembatya dzinodziya. Kana vanhu vakazotangisa kuriisa mishonga mimwe yacho inokuvadza yopedzisira yave kuita kuti guvhu iroro riwore kana kubuda hurwa.
Mwana anopedzisira ave kungobatwa nezvirwere zvakasiyana nekuda kweutachiona hunenge hwapinda nepaguvhu nekuti pane nyama nhete. Tinokurudzira vabereki kuti kana pachinge paita zvinhu zvavanenge vasinganzwisise maringe neguvhu remwana vaende kunobvunza machiremba kuti vabatsirwe,” vakadaro.
Online Reporter