adminAbel Ndooka
CHIKWATA chenhabvu chenyika chemaWarriors chakapinda mukembi svondo rino umo chakatanga kuita gadziriro dzemutambo weAfrican Nations Championships (CHAN) uchatambirwa kuRwanda munaNdira gore rinotevera. Aka ndekechina maWarriors achibudirira kuenda kumutambo uyu. Mumutambo weCHAN wekupedzisira wakatambirwa kuSouth Africa mugore ra2014, maWarriors akatamba nhabvu inonwisa mvura izvo zvakaona achisvika kusemi-fainari akazoburitswa neLybia iyo yakahwina mutambo uyu.
Panguva iyi, Ian ‘Dibango’ Gorowa ndiye airairidza maWarriors achibatsirwa naCallisto Pasuwa uyo ari kurairidza maWarriors parizvino.
Zvakadaro, kumutambo weCHAN uriko parizvino, maWarriors akaiswa muboka remuGroup D rine zvimwe zvikwata zvinoti Uganda, Mali neZambia uye anofanirwa kurwa amire kuti agokwanisa kufambira mberi.
Mukushi wemashoko weZimbabwe Football Association, Xolisani Gwesela, anoti sangano ravo parizvino riri muhurukuro nezvikwata zvakasiyana kuti zvigokwanisa kutamba mitambo yehushamwari neWarriors segadziriro dzavo.
Mitambo yehushamwari yakakosha chaizvo mugadziriro dzemaWarriors sezvo zvichipa Pasuwa mukana wekuongorora vatambi vake vose.
“Tiri kuda chaizvo kuti vakomana vedu vagotambe mitambo yehushamwari yekugadzirira kuenda kuCHAN.
“Parizvino tine dzimwe nyika dzatiri kukurukura nadzo kuti tigotambe tese. “Tichange tave kuziva svondo rinotevera kuti tichatamba nezvikwata zvipi segadziriro dzedu asi tinovimba kuti tichawana vekutamba navo zvitibatsire mugadziriro dzedu,” akadaro Gwesela.
Zvakadaro, sangano reThe Friends of the Warriors rinoti riri kumhanya-mhanya kutsvaga mari yekuti rigoperekedza chikwata ichi kumutambo uyu.
Munyori mukuru wesangano iri, Zivanai Muwashu, anoti vane chishuwo chikuru chekunotsigira maWarriors kumutambo wekuRwanda uyu.
“Isu basa redu kutsigira maWarriors uye tichaenda navo kunovapa rutsigiro rwakasimba kuti vagohwina mitambo yavo,” akadaro Mushawu.
Online Reporter