Online Reporter
Kingstone Mapupu
MUMWE wemakororo ange ashaisa rugare vagari vekuBulawayo nekuvabira midziyo nezvimwe zvakasiyana-siyana, Nhlanhla Ncube (36), akasungwa nemhosva yekuba akapakata pfuti.
Mutauriri wemapurisa ematikitivha echikamu cheCriminal Investigation Department (CID), Detective Inspector Rachel Muteweri, vanoti nemusi wa25 Kurume, Ncube akarangana naFarai Simba Sibanda, Learnmore Sibanda naProsper – avo vasati vasungwa – ndokufamba vachiba kunzvimbo dzakasiyana kuBulawayo.
Vanonzi vakasvika pabhawa reManthalini Sports Bar kuNketa kuBulawayo ndokuba US$1 000 vachibva vavhundutsira vashandi vemo.
Nemusi mumwechete uyu nenguva dza10:55 pm, vakaenda kubhawa reNketa 7 Tarven kuBulawayo kwakare vaine pfuti duku dzemapistols nemapanga ndokunobata vashandi vemo vachiti vaida mari nezvimwe zvakakosha.
“Vakasvika vakatora makiyi epaimba yekuchengetera zvinhu umo vakakiinura ndokuba mari yaivamo, vakazoba doro raivamo zvekare vachibva vabva panzvimbo iyi,” vanodaro Det Insp Muteweri.
Vanoti nemusi wa16 Kurume, chikwata ichi chakaenda mune chimwe chitoro ndokuba zvinhu zvakasiyana.
Det Insp Muteweri vanoti Ncube akazosungwa nemusi wa31 Chivabvu apo matikitivha akawana runyerekupe rwekuti aiva nechekuita nekubiwa kwezvinhu munzvimbo dzakasiyana kuBulawayo.
“Pakusungwa kwake, zvombo zvavaishandisa mukuba zvakabva zvawanikwa zvose zvinosanganisira, mabhemba, piki, matemo madiki maviri nepfuti yeBlack AK SAARM SA21 Blank gun. Zvakadai, tiri kutsvaga mamwe makororo aiva pamwechete naNcube anosanganisa Farai Simba Sibanda, Learnmore Sibanda naProsper. Kune vane mashoko avanoda kupa kumapurisa, vakasununguka kuridza nhare panhamba dzinoti 0242703631 kana 0712 800 197,” vanodaro Det Insp Muteweri.
Vanoti ruzhinji rwunogonawo kushandisa dzimwe nhamba dzenhare dzinoti 0773 035 028.
