Online Reporter
Kingstone Mapupu
MAPURISA eZimbabwe Republic Police (ZRP) kuMasvingo ari kutsvaga hama dzemurume, uyo asiri kuzivikanwa zita rake kana kwaanobva, akatsikwa nemotokari ichibva yatiza mumugwagwa weHarare-Masvingo pachinhambwe che279 kilometre peg padyo neMayo Turn-Off nemusi wa15 Chivabvu gore rino.
Mutauriri wemapurisa kudunhu reMasvingo, Inspector Kudakwashe Dhewa, vanoti murume uyu ane muviri uri pakati nepakati, ari mushava uye angangodaro aine makore 40 ekuberekwa.
“Murume uyu aive akapfeka bhutsu dzematackies dzine ruvara rutema neruchena, T-shirt tsvuku ine maoko marefu netirauzi dema. Mutumbi uyu uri kumochari yechipatara cheMasvingo General Hospital. Mapurisa vari kukumbira kune ruzhinji vangangodaro vakashaya hama yavo yechirume kuti vauye kuzoongorora chitunha ichi,” vanodaro Insp Dhewa.
Vane ruzivo pamusoro pemurume uyu vanokwanisa kutaura naOfficer In-Charge ZRP Masvingo Traffic, Inspector Simari Melton, panhamba dzinoti 0773 050 575 kana naInvestigating Officer Constable Jumi Elizabeth pa0782 374 910.
Insp Dhewa vanokumbira zvekare vanhu vane ruzivo pamusoro pemotokari yakatsika murume uyu ndokuzotiza kuti vazivise mapurisa ari pedyo navo.
