Online Reporter
Abel Ndooka
MITAMBO yeCastle Lager Premier Soccer League iri kudzoka svondo rino, apo mukuru wacho uchange uri pakati peSimba Bhora neHighlanders kuBarbourfields Stadium, kuBulawayo, nemusi weSvondo.
Izvi zvinotevera kumiswa kwainge kwamboitwa mitambo yePSL svondo radarika apo chikwata chemaWarriors chaitamba mitambo yehushamwari kuMorocco uye chimwe chevadiki chichikwikwidza kumutambo weCosafa Cup, uyo waitambirwa kuSouth Africa.
Chikwata chemaWarriors chevakuru chakatamba mitambo miviri yehushamwari. Mune wekutanga, chakakundwa 2-0 neBurkina Faso. Mune wechipiri, MaWarriors akaita mangange 1-1 neNiger.
Chikwata chevechidiki, icho chaive kuCosafa Cup, chakaita mangange mumutambo wekutanga 0-0 neMauritius, chikazokundwa 2-0 neSouth Africa. Chakazokunda Mozambique 3-1 mumutambo wekupedzisira muboka ravo reGroup A.
Zvichitevera kupera kwemitambo iyi, maziso ese ave kudzokera kumitambo yePSL svondo rino, apo mukuru wacho uchange uchitora nzvimbo kuBarbourfields Stadium, uko shasha dzePSL, Simba Bhora, dzichange dzichitatsurana neHighlanders “Bosso”.
Bosso ichapinda mumutambo uyu morari yayo yakasimuka zvichitevera kukotsverwa kwayakaitwa namuzvinabhizimisi ane mukurumbira — Sir Wicknell Chivayo — uyo akaidururira mari inosvika US$1 miriyoni.
Sir Wicknell akanyora papeji rake reFacebook kuti anotsigira chikwata ichi uye rudo rwake neBosso rwakauya mushure mekunge akurudzirwa kuti aitevere nekuitsigira nasekuru vake, mushakabvu gamba renyika Cde John Landa Nkomo, avo vaimbove mutevedzeri wemutungamiri wenyika.
Mutambo weBosso neSimba Bhora uchatora nzvimbo musi weSvondo.
Chikwata chiri kupisa muPSL mwaka uno cheMWOS FC chiri kuenda kuGibbo Stadium kunosangana neTriangle United musi weSvondo.
MWOS FC iri kunetsa kukunda uye masvondo adarika, murairidzi wachikwata ichi — Lloyd “Samaita” Mutasa — ndiye akahwinha mubairo weCoach of the Month wemwedzi waChivabvu.
Chikwata cheScottland chichange chiri pamusha kuRufaro musi weSvondo, apo chichasangana neKwekwe United, kwoti Dynamos FC iri kuenda kuGibbo musi weMugovera kunotamba neBikita Minerals.
