adminCharity Moyo
INHLANGANISO ebona ngezokulima eyeAgritex isikhuthaze abalimi ukuthi balime inhlanyelo ezehlukeneyo ngoba kungaziwa ukuthi ezavuthwa yiphi.
UMnumzana Davison Masendeke onguProvincial Agronomist esabelweni seMatabeleland North uveze ukuthi abalimi kumele balime inhlanyelo eziphangisa ukuvuthwa njalo ezilakho ukumelana lokutshisa kwelanga ngoba lonyaka kukhanya kuzatshisa kakhulu.
Uthe abalimi kumele balimuke ngoba umkhathi walonyaka ulokoma okwedlula okweminyaka edluleyo. UMnu Masendeke uthe njengoba kutshisa kubalulekile ukuthi abalimi bakwazi isikhathi sokufaka inhlanyelo phansi.
“Kuminyaka etshisa njengalo abalimi kumele bahlanyele izilimo eziphangisa ukuvuthwa kanye lezimelana lokutshisa kwelanga.
“Inyawuthi ingaphathisa kakhulu abalimi ngoba kayiphangisi ukutsha njalo kayifuni izulu elinengi.Umlimi angaba kwazi lokhu kulula ukuthi azitshayele inala ngesikhathi abanye bekhala ngendlala,” kulandisa uMnu Masendeke.
Uqhubekele phambili esithi uhlupho lwabalimi abanengi beMatabeleland yikuthi bathanda ukulima umumbu kukanti wona ufuna izulu elinengi njalo uyaphangisa ukutsha nxa ilanga lingatshisa.
Uphinde wakhuthaza abalimi ukuthi inhlanyelo yohlobo lwenyawuthi lamabele ephangisa ukuvuthwa iyatholakala ezitolo ngakho abalimi kabaphange bayithenge intengo isephansi.
“Kangitsho ukuthi abalimi bangalimi umumbu kodwa kumele babe lezinye indima zenyawuthi kanye lamabele ukuze nxa kungatshisa babe lakho ukudla,” kuveza uMnu Masendeke.
Ekhuluma ngesikhathi sokufaka inhlanyelo phansi uthe kubalulekile ukuthi abalimi baqalise ukufaka inhlanyelo yabo phansi kusukela kunyanga ezayo ekaLwezi mhlaka 10 kusiya phambili ngoba izulu liyabe seliseduzane. Uthe izulu lilakho ukusewula iloba nini kodwa nxa abalimi bengaphosa inhlanyelo phansi masinyane ilakho ukucina itshiswa lilanga elikhona.
“Khathesi abalimi kabaqedise nje ukufaka umqhuba emasimini kanye lokuthenga inhlanyelo abafuna ukuyilima. Ingozi isekuthini umlimi engahlanyela ngezulu lokusewula izilimo zakhe zilakho ukumila kodwa zibuye zitshe ngelanga,” kuphetha uMnu Masendeke.
Online Reporter