admin
Charity Moyo
INHLANGANISO ebona ngezifuyo eyeLivestock Production isikhuthaze abalimi ukuthi banakekele kuhle izifuyo zabo ukuze bathole inzuzo ephezulu.
Lokhu kuvezwe nguMnumzana Cosmas Muzunde onguLivestock Production Officer ngemva kokunanzelela ukuthi abalimi abanengi sebelahle ithemba ngezifuyo zabo ngenxa yokutshisa okukhona kanye lendlala esibhahile.
UMnu Muzunde uthe inengi labalimi selilahlekelwa zinkomo ngoba emadlelweni kungaselatshani.
Uveze ukuthi abalimi kumele balandele izixwayiso zababona ngezifuyo ukuze benqabele ukulahlekelwa yizifuyo.
Uthe kuke kwaba lesaziso esaveza ukuthi abalimi kabaphungule inani lezifuyo zabo ngoba umumo mubi kodwa abalimi abanengi abakwenzanga lokhu.
“Sakhipha umbiko sikhuthaza abalimi ukuthi behlise inani lomhlambi wabo kodwa abanengi abakwenzanga lokhu kodwa-ke ngaleso sikhathi zazilakho ukuthi zithengiswe ngemali ephezulu kulakhathesi lapho esezisifa zodwa kukanti ezinye sezithengwa ngemali engatsho lutho,” kutsho uMnu Muzunde.
UMnu Muzunde uthe abalimi balakho ukuthi bathengise ezinye izifuyo kulezo abasele lazo ukuze benelise ukuthengela ezinye ukudla.
“Umumo womkhathi walonyaka ngithemba ube yisifundo esikhulu lakulabo abangakholwayo ukuthi umumo womkhathi usuguqukile kungakho sebezakwenelisa ukuthi bakwazi ukulandela izixwayiso esibapha zona.
“Kubuhlungu ukuthi ngemva kokuqeda iminyaka embalwa ugcine izifuyo ulahlekelwe yizo zonke, ngakho kubalulekile ukuthi abalimi baqakathekise izifuyo zabo bazibone njengenzuzo kulokuthi bazibone njengempahla,” kutsho uMnu Muzunde.
Uphethe ngokukhuthaza abalimi ukuthi benze imizamo yonke esemandleni abo ukuze bathengele izifuyo zabo eziseleyo ukudla isikhathi sezulu size sifike.
Online Reporter