admin
Gamuchirai Muzanenhamu —
CHIREVO chekuti hurombo huroyi chave kuzadziswa nenyaya yemumwe murume anoti mudzimai wake ave kumupomera mhosva yekuti anomushungurudza nekuda kwehurombo. Collen Makura akataura mashoko aya mudare reHarare Civil Court mushure mekunge amhan’arirwa nemudzimai wake, Rita Makura, uyo anoti ari kumushungurudza.
Rita anoti pose paanotadza kuwirirana nemurume wake, anomutuka zvekuti anoshaya pekupinda nekunyara.
“Ndauya kuno nemurume wangu nekuti pese patinopesana mafungiro, anondituka nekundityisidzira achida kundirova,” anodaro Rita.
Anoti murume wake anomushungurudza kunyangwe zvazvo achizviziva kuti anorwara.“Murume uyu anondisandudzira kumadziro achindizunza asi achiziva kuti ndinorwara nemusana. Madhokotera vakanditi ndisaite zvinokanganisa muviri wangu,” anodaro Rita.
Achibvunzwa nedare kuti anopokana here nechikumbiro chemudzimai wake, Collen anoti haana dambudziko nazvo, kunyangwe zvazvo Rita achitaura manyepo.
“Handina dambudziko nechikumbiro chemukadzi wangu, asi zvese zvaataura manyepo,” anodaro Collen.
Anoti hurombo hwaave nahwo ndihwo hwave kuita kuti Rita amutsvagire tumhosva tusina basa.
“Chingoripo ndechekuti izvezvi handichaenda kubasa, ndakamiswa saka tunyaya twese utwu ndetwekunyepa, turi kubva pahurombo hwandava nahwo. Ndava kutofunga kuti pamwe haachandida.
“Kutaura kuno tiri kuchengetwa nehama dzake saka zvakadaro haachandiona semurume, ava kundipopotera semwana mudiki zvekuti anotombondituka kuti imbwa ndikada kumupindura obva ati ndinomutuka. Ndava kugara kunge muranda,” anodaro Collen.
Rita anopikisana nemashoko aya achiti murume wake ane nungo, haadi kumubatsira pamabasa epamba kana kutsiurwa paanenge atadza.
Mutongi Nyasha Marufu akapa Rita gwaro redziviriro.
Online Reporter