admin
Ethel Ncube
KULEMULI yeHabane eSigodini esele izidla amathambo engqondo kulandela ukukhitshwa kwengwenya phakathi komatilasi endlini yokulala okucatshangelwa ukuba yiyo ebibangela ukufa kwamalunga omdeni.
Lezakhamizi ezayibona isaphila ziyagula njalo ezinye zazo sezivela dinga usizo esibhedlela.
Isiga lesi senzakale emulini yakoMaria Nkomo (31) ngeviki ephelileyo ohlala elokitshini leHabane.
Ingwenya le itholakale embhedeni olala umnawakhe uSikhululekile Nkomo.
Abemuli basola ukuthi omakhelwane babo yibo ababathumele inyamazana le ekhitshwe iphila ukuze ihlale ibakhahlameza.
Intatheli kaMthunywa ixhumane lesinye isakhamuzi uNkosazana Mercy Dube esiveze ukuba sifike ngesikhathi umbheda lo sukhitshelwe phandle kuhwatshwa ingwenya eyayiphakathi.
“Mina ngafika ngesikhathi ingwenya le isibulawa, ngazibonela ngawami amehlo iphuma phakathi kombheda.
“Yayilolaka ibaleka ngesikhathi ibulawa ifuna lokudla abantu,” kulandisa uNkszn Dube.
Kuzwakale ukuba imuli yakoNkomo ibisibhode osiyazi labaphurofethi yaze yabeka phansi ngoba inyamazana le ibibenza babeyizicubu njalo kungacaci ukuthi baphathwa yini.
“Okwezinkonzo angisatsho, sebebhode zonke ezomoya bezama ukusizakala. Lamuhla sebeze benelisa ukukhupha linto ebisiqalise ukubadlela labantwana,” kuchasisa uNkszn Dube.
UMthunywa uzwe ukuba ingwenya le ibihlala endlini ilala phakathi kombheda isidla labo kodwa bona bengayiboni, ngesinye isikhathi bezwe kulento ephalayo phezu kwamazenge endlini badinge kodwa phinde babone lutho.
Iphephandaba likazulu likhulumisane lomunye umfakazi uMnumzana Bhekimpilo Moyo oveze ukuthi isimanga esinjalo ngempela senzakala.
“Ingwenya yaphuma sibili koNkomo, abaseduze bayibona kodwa umoya waveza ukuthi ayisiyo yabo ngeyakomakhelwane wabo wasePlumtree.
“Bayithunyelwa ngesikhathi sebetshonelwe ngabazali ukuthi badubeke baze bayekufa kungabi lalutho lwabo lolulodwa oluphutshayo,” kulandisa uMnu Moyo.
Intatheli ibuye yakhulumisana lomphurofethi onguye owenelise ukukhupha lokubulala lingwenya uMnumzana Archford Sibanda, laye ofakaze ngaloludaba.
“Kwaphuma ingwenya sibili njalo mina ngesikhathi ngizama ukuyikhupha yangiluma ngamazinyo engalweni.
“Omunye umfana owayibonayo wahle waqubuka umzimba wonke wamila amaqhubu angaqedakaliyo.
“Kwathi lepholisa lesigaba lalo lakhafulelwa ilihlo sikhuluma nje lokhe libuhlungu,” kutsho umphurofethi Sibanda.
Iphephandaba likazulu libuye lakhulumisana loNkosikazi Maria Nkomo ovumileyo ukuthi ingwenya le yayihlala endlini yakhe.
“Kunzima ukuthi ngingathini ngoba amanye amalunga emuli awakho kodwa udaba olunjalo luyaphila.
“Kwakhulekwa umoya wasuveza ukuthi okusihluphayo yingwenya eyakhutshwayo embhedeni umphurofethi wayibulala simncedisa thina amalunga emuli.
“Ingwenya le ibisidla abantwana abangabafana ngoba mina ngabhujelwa ngumntwana lomnewethu laye wabhujelwa ngendlela engazwisisekiyo.
“Saya kubosiyazi satshelwa ukuthi kulengwenya eyiyo ebulala abantwabethu. Mina lokhu ngiyakukholwa laloba abantu bethi ngamanga thina kithi abanikazi obekusihlupha yithi esazi iqiniso lonke,” kuchasisa uNkkz Nkomo.
Uqhubekele phambili esithi ingwenya le bayigciniswa bengakwazi ngemva kokufelwa ngabazali.
“Ebusuku besingabuquthi ngoba ingwenya le ibilala idlepha ophahleni kodwa lokhe yabulawayo sibethwa ngumoya, sesizilalela obukaBhuka,” kuphetha uNkkz Nkomo.
Online Reporter