admin
Yintatheli kaMthunywa
KULENYANGA yeKenilworth eNyathi kuVillage 3 etholakale ileqhaga lokugcinela amaphoso lemikhoba efunge yagomela ithi ngeke; nxa kutshiswa iqhaga akutshiswe layo.
Inyanga le, uSibekiwe Moyo owazakala ngelikagogo uMaMoyo, ihlala ngaphansi kukaSobhuku uLivion Moyo.
Lesi sehlakalo senzakale ekuqaleni kwayonale inyanga ngemva kokuba izakhamizi zinxuse abaphurofethi ukuzohlahlula isigaba.
Inyanga le ibikwa ibiphosa abantu kanye lokubehlisela amashwa ngoba kukhanya ibisingenwe ngumona kukanti yayithenjiwe esigabeni.
Kuzwakale ukuba ugogo uMaMoyo ubeyinyanga ebiselapha kakhulu kodwa khathesi ubengaselaphi ubesesona njalo esenza abantwana abadinga imisebenzi bengayitholi.
UMthunywa ongelampontshi uphuthume wayafika kuVillage 3 ukuze ayezwisisa ngaloludaba.
Ufike wakhulumisana lesakhamuzi esasikhona mhla womhlahlo, uNkosikazi Nomusa Zikhali.
“Ngangikhona ngesikhathi kuthiwa ugogo uMaMoyo kayethatha iqhaga lakhe alisebenzisa ukuphosa abantu.
“Abanye bebebhewulwa yizimota lezakhamizi zivukelana ubhova emihlanganweni.
“Wahamba wayalithatha wabuya lalo ukuthi litshiswe wavuma layatshiswa ekhangele kodwa ngesikhathi lisitsha wezwakala esebhonga enqunula wasala ngesudu yakhe yokuzalwa esithi ufuna ukutshiswa leqhaga,” kulandisa uNkkz Zikhali.
Intatheli iphinde yaxhumana lesinye njalo isakhamuzi uTholani Masuku ofakaza ukuba iqhaga lalethwa enkundleni latshiswa kwacaciswa ukuthi litshiselwani.
“Wabuya lalo lafakwa emlilweni latshiswa akukhitshwanga lutho phakathi. Engakubonayo lapho akukhulumeki.
“Ugogo uMaMoyo wayengani angaze angene phakathi laye esekhuphe lezigqoko thina njengabobaba saswela ukuthi singene ngaphi,” kutsho uMnu Masuku
Iphephandaba likazulu lizwe ukuba ugogo uMaMoyo ubethi angakucaphukela kumbe angabona esinye isakhamuzi siphumelela akhulume leqhaga lakhe lowomuntu awelwe ngamashwa.
Intatheli ikhulumisane lesinye njalo isakhamuzi esiziveze ngokuthi nguKhathele Ndlovu sona esibike ukuba khathesi sebezake batshaywe ngumoya.
“Bancedile abaphurofethi laba batshisa impahla yobuthakathi sesizaphumula ubevele egangile,” kulandisa uNkkz Ndlovu.
Intatheli ibuye yaxhumana lalowo ocatshangelwa ukuthi ngumnikazi weqhaga yena ovumileyo ukuba elakhe walihambisa kubaphurofethi.
“Ngibuhlungu njalo ngifuthelene, bangephule umoya lababantu ngokungingcolisa bethi ngiyaloya mina kangiloyi ngitsho, ngiyelapha lokho yikungigcona abangenza khona.
“Ububi bami ebusweni abutsho ukuthi ngiyathakatha angikwenzi lokho. Into eyakhulunywa ebantwini embi ukuthi ngiyaphosa abantu kumele labo abakutshoyo babuye bakwesule njalo ngiyabadinga ngoba ngizonde kabi njalo angibabhadali lutho,” kutsho uMaMoyo.
“Iqhaga lami ngangilihambisele ukuthi bayelilungisa ngoba laselonakele kanti bona sebezafika belitshisa mina bengilisebenzisa ukwelapha.
“Bathi lilemikhoba kodwa mina angiwazi lokuthi unjani lokhe ngaba yinyanga angikaze ngiwubone pho ngingawugcina njani?”
Online Reporter