admin
Nkosilathi Sibanda
ISIKWAMULA senguqu, uKnox Mutizwa osedlale imidlalo embalwa nje, kulabanye bakhe kuHighlanders kuligi yePSL usehlohle amabhola amanengi njalo bayehluleka ukuthi bamedlule.
UMutizwa okwamanje usetshengise ukuthi iligi ephakemeyo kuleli ayilabo abadlali ababukhali enyaweni nanko phela lanxa ehluleke ukudlala imidlalo emine kodwa lokhu eqhubeka ekhokhela abanye abadlali ngamabhola asewahlohlile.
Umgadli weBosso lo uselamabhola alitshumi lanye njalo nguye okhokhela bonke ngemva kwemidlalo engamatshumi amabili lane.
Iphephandaba likazulu likhulume loMutizwa ngoLwesithathu ekuseni wabika ukuthi isifiso sakhe ngesokuthi ahlohle amabhola angamatshumi amabili.
Kusele imidlalo eyisithupha ukuthi iligi iphele, umbuzo okhona yikuthi uMutizwa uzenelisa na ukuthi agcwalisise isifiso sakhe sokuhlohla amabhola angamatshumi amabili.
Nxa kungenzeka lokhu, kutsho ukuba uMutizwa kuzamele ahlohle ahlohle kuyo yonke imidlalo eseleyo.
Iligi yeCastle Lager isingene kuviki lomdlalo wamatshumi amabili lasitshiya galo mbili.
“Amabhola engiwahlohlileyo awathabisi ngoba bengifuna ukuthi ngesikhathi lesi ngibe sengihlohle afika alitshumi lanhlanu.
“Isizini le isiyaphela ngizabe ngibalelwa kulabo abakhokhelayo njengakhathesi.”
Ukuzitshela kukaMutizwa kubeka isimo seligi emehlweni abantu ngoba kulobufakazi bokuthi inguqu yeZimbabwe ayilabo abagadli abahlohlayo.
Abacubunguli benguqu babika ukuthi iligi yalonyaka ayilathalenta.
Abadlali asebehlohlile okwamanje:
Mutizwa Knox (Highlanders) 11, Chirambadare Edmore (Chicken Inn) 10, Chitora Tinei (Chapungu) 8, Manuvire Rapheal (ZPC Kariba) 8, Muzondiwa Brain (FC Platinum) 7, January Timothy (How Mine) 7, Tavarwisa Allen (Chapungu) 6, Chikafa Limited (ZPC Kariba) 6, Chirwa Obrey (FC Platinum) 6, Chitiyo Ronald (Dynamos) 6, Chungwa Dominic (Caps United) 6, Katsvairo Mitchell (Chicken Inn) 6, Musona Walter (FC Platinum) 6, Mutuma Rodrick (Dynamos) 6, Nhamo Lameck (Triangle) 5, Bakacheza Hillary (Triangle) 5, Kawondera Richard (Dynamos) 5, Ngoma Donald (FC Platinum) 5, Sianchali Newman (Hwange) 5, Tarumbwa Obediah (Highlanders) 4, Chikuwa Lynoth (Tsholotsho) 4, Chinyama Takesure (Dynamos) 4, Demera Moses (Flame Lilly) 4, Kadewere Tinotenda (Harare City) 4, Katongomara Lloyd (Bufalloes) 4, Madhazi Physwell (Dongo Sawmill) 4, Maglasi Benson (Harare City) 4, Manhanga Pascal (Triangle) 4, Matawu Clement (Chicken Inn) 4, Muzokomba Jacob (Buffaloes) 4, Nyamiwa Artwell (ZPC Kariba) 4, Rusike Evans (Hwange) 4, Useya Roy (Whawha) 4, Zulu Gilbert (Hwange) 3, Banda Farai (Buffaloes) 3, Chandisaita Brighton (Flame Lilly) 3, Chigora Macmillan (Flame Lilly) 3, Dauda Dennis (ZPC Kariba) 3, Fiyado Leonard (ZPC Kariba) 3, Jam James (Harare City) 3, Kamudyarewa Wellington (FC Platinum) 3, Kuswatuka Felix (Triangle) 3, Mangadze Munyaradzi (Hwange) 3, Mukudo Virimai (Flame Lilly) 3, Munondo William (Harare City) 3.
Online Reporter