adminDaphne Machiri
MUTYAIRI wekombi inoenda kwaMusana, kuBindura, akasungwa nemhosva yaari kupomerwa yekutyaira zvisina hanya zvikaita kuti akonzerese kufa kwahwindi ainge akarembera kumashure kwekombi ichifamba.
Jeremiah Shangai (32) anogara kubhuku rekwaChiveso akasungwa nemhosva yekukonzeresa kufa kwaElisha Shangai (32) uyo anonzi akange akabatirira kumashure kwekombi ichifamba.
Mutevedzeri wemutauriri wemapurisa kudunhu reMashonaland Central, Assistant Inspector Fedelis Dhewu, vanoti njodzi iyi yakaitika mumugwagwa weBindura-Denda nemusi wa31 Zvita.
Vanoti Jeremiah akasungwa zvichitevera kunyeverwa kwakaitwa mapurisa neveruzhinji nezvenyaya iyi kuburikidza netsamba yakakandwa musuggestion box repakamba yemapurisa yemunzvimbo iyi zvikaita kuti nyaya iyi itange kuferefetwa.
“Jeremiah, uyo aityaira kombi yerudzi rweNissan Caravan AEU 6247 – muridzi wayo ari Ernest Chimedza (38) wepa2754 Erodrome Road, Bindura – anoti akaona hwindi akajegera pabumber kumashure kwekombi ichifamba zvinova zvakaita kuti adonhe.
“Anoti akamira ndokusimudza hwindi Elisha akange adonha ndokumuendesa kunachiremba akazvimirira. Vakanzi vaende kuBindura District Hospital asi vari munzira vachienda ikoko ndipo pakabva pafa Elisha,” vanodaro Asst Insp Dhewu.
Vanoti Jeremiah akatakura Elisha akakuvara kudaro asi maringe nemutemo weRoad Traffic Act aifanirwa kumhan’ara tsaona iyi kumapurisa.
Asst Insp Dhewu vanoyambira vari mubasa remakombi kuti vasiyane netsika yekurembera kumashure mota ichifamba.
Online Reporter