Online Reporter
Nkosilathi Sibanda
I-BINGA Academy isithole usekelo olukhulu lokuthuthukisa ithalenta lenguqu ngemva kokuphiwa i-kit entsha lokuncediswa ekubhaliseni iqembu layo le-Under-17 kuZifa Binga Division Two League
Lokhu kukhangelelwe ukuthi kuthuthukise indlela i-academy le eziveza ngayo ngobungcitshi njalo kuvulele intsha yeBinga amathuba amanengi okutshengisa ithalenta.
Ekhuluma ngesikhathi kusethulwa i-kit le ngoMvulo, umqondisi weBinga Football Academy uthe baletha isibongo esikhulu kunkampani yeCadle Supplies kunye loLord Ndwandwe ngalesi isipho.
“Kithi, isipho se-kit sitsho okunengi. Kutshengisa ukuzinikela kwethu ekusekeleni amaphupho lekusasa lalaba bantwana abalethalenta. Kuyasithokozisa ukuba yingxenye yohambo lwabo lokuphumelela,” kutsho uNgwenya.
Uthe uxhaso lolu olwenziwe yinkampani yeCradle Supplies, luzancedisa ekubhaliseni iqembu le-Under-17 ukuze iqembu lidlale emiqhudelwaneni yebhola kulindawo.
Uveze ukuba bathola ukuzazi ngoNdwandwe owake wadlalela amaqembu eHwange leCaps United, uWitness Munkuli, abamchaze njengomunye wabantu abaqakathekisa ukuthuthukiswa kwebhola eBinga kusukela kudala.
UMunkuli, elomqeqetshi ongumhlaziyi osebenza njengomsekeli kamqeqetshi kuqembu lesizwe leScotland, u-Ashley Bheki Ndebele, bangabanye babaqeqetshi bokuqala abazinikela ukuyafundisa iqembu leBinga Pirates ngesikhathi lidlala kuSouthern Region Division One League.
I-academy le ithe laba abaqeqetshi badlala indima enkulu ekubumbeni ibhola eBinga lokukhuthaza abadlali ukuthi bakholwe kumathalenta abo.
“Siyambonga kakhulu uMqeqetshi Witness ngokuthobeka kwakhe lothando alutshengisa kubadlali beBinga District. Uhlezi engomunye wabantu abaqakathekileyo ekukhuleni kweBinga Football Academy lokusekela ukuthuthukiswa kwebhola esigabeni” kutsho uNgwenya.
Uthe i-kit entsha izanceda ukuthuthukisa indlela abadlali abaziveza ngayo enkundleni langaphandle kwayo.
“Isipho lesi sizanceda ukuthi iBinga Football Academy yamukelwe njengenhlanganiso esebenza ngobungcitshi ngendlela abadlali bethu abaziphatha njalo abaziveza ngayo.”
I-Binga Academy iphinde yabonga bonke abake bayisekela kusukela yasungulwayo. Phakathi kwabo kukhona amabhizimusi ezokuvakatshela agoqela iJourney’s End Lodge, Masumu Lodge, Lakeview Inn, Batonga Villa, Twice Happy Lodge leKabila Lodge.
Kubongwe njalo iMr Sinkwa, Kwikmart Spar, ilRare Breed, Miracle Helping Hand kanye leMappe Supermarket, abaqhubeke besekela i-academy lanxa izinto bezinzima.
I-academy iphinde yabonga abakhokheli bakaHulumende, ikhansili yeBinga lomphakathi.
Ngesikhathi bethakazelela usekelo abalutholileyo, abaphathi be-academy banxuse abanye osomabhizimusi labafisa ukubona ibhola leBinga lithuthuka ukuthi labo bafake isandla.
“Sisadinga indawo esingayisebenzisa njengekhaya le-academy lezimota zokuhambisa abadlali emidlalweni. Sinxusa bonke abafisa ukubona iBinga ikhula kwezemidlalo ukuthi basisekele,” kutsho uNgwenya.
