Online Reporter
Ethel Ncube
KWEHLE iyezi elimnyama kwenye imuli eFilabusi ngemva kokuba kugwazwe enye indoda eleminyaka engu-20 yokuzalwa ngesikhwili sokuthathelana intombi.
Isehlakalo lesi senzakale ngeviki ephelileyo eMacoomber 14 Mine.
ULuckson Mangizi kubikwa ugwazwe ngengqamu watholakala efile egangeni ngomunye umakorokoza obesedlula.
Abasiki bebunda bathi uLuckson loMartin baxabana kubangwa ukuba uLuckson wayesekhonjwe yintombi kaMartin. UMartin yena waliwa wasebamba isikhwili.
Omunye ufakazi uMnumzana Melekeleli Dube ubike ukuba amadoda la abambelana isikhwili sentombi.
“ULuckson loMartin bahlangana emkhukhwini wentombi abayibangayo. ULuckson kazange esasondela kodwa wazimela bucwadlana wazinathela utshwala.
“UMartin waqhubeka ezikwejisele lentombi yakhe. Kuthe sekuntambama uLuckson wasondela lapho ababekwejise khona wafika wabuza uMartin ukuthi balobudlelwano bani kwahle kwaqala umsindo wathi phothololo.
“UMartin khonokho wakhupha imvubu kunye lengqamu okuthiwa yi-columbia wagwaza uLuckson. ULuckson wacela ezinyaweni wangena iganga, uMartin wamhlala izithende, asazi ukuthi wambamba kumbe hatshi khonale egangeni basebebabili akula okwaziyo kodwa uLuckson watholakala esefile ngosuku olulandelayo duze kwendlela,” kubika uMnu Dube.
Isakhamuzi esikhulume loMthunywa uMnumzana Edwin Mathe uthe ababili laba bebebanga intombi.
“Sihlala sibatshela abafana laba abazwisisi ukuthi umfazi uyabulalisa nanku lamuhla uLuckson usehambile kubangwa intombi.
“UMartin wamgwaza ngoba wathi evela mgijimisa waphenduka ingqamu yakhe ilegazi wayifaka esikhwameni wahle wabaleka,” kubika uMnu Mathe.
Isikhulumi samapholisa eMatabeleland South uInspector Chiratidzo Dube uqinisekise ngodaba lolu.
Uthe uMartin Ncube ovela eNkayi ubelesikhwili loLuckson Mangizi kubangwa intombi.
Kubikwa ngosuku olulandelayo isidumbu sikaMangizi sabonwa ngomunye umakorokoza owayehamba ngendledlana le. Indaba le yabikwa emapholiseni afika endaweni le achwayisisa andubana athwalele isidumbu emotsha yeFilabusi District Hospital.
UInsp Dube ukhuthaza umphakathi ukuthi lowo ongabe esazi lapho okulometheswacala abikele amapholisa aseduzane laye ukuze abotshwe.
Ubuye wakhuthaza abantu ukuthi bangaze bathanda udlame nxa kulokungazwisisani.
“Amapholisa akhuthaza ongabe esazi lapho okuloMartin Ncube ukuthi athinte uSergeant Mbizo onguye ochwayisisa ngodaba lolu ku 0777 248 757 / 0714 100 448 kumbe abikele amapholisa aseduzane laye. Sikhuthaza njalo uzulu ukuba atshiye umkhuba wokusebenzisa udlame kodwa basebenzise ezinye indlela zokukhumisana umlotha,” kutsho uInsp Dube.
Bongani Ndlovu