adminCornelius Luphahla
INHLANGANISO ezimele yodwa eye-Christian Care isiphathise abaphila lobugoga kanye lasebekhulile ngokubakhela amabhawuza okugcinela amanzi kuWadi 19 eLupane.
Inhlanganiso le iqale ukwenza lokhu esigabeni seSibangani kunyanga ezimbili ezedluleyo njalo amanye amatanka la amanzi asephelile ukwakhiwa.
UMthunywa ukhulumisane loMnumzana Morgan Ngwenya omunye wamalunga ekhomithi ekhangela ngokwakhiwa kwamabhawuza la wachaza ukuthi akhelwa abaphila lobugoga kanye lasebekhulile ukuze bathole amanzi eduzane.
“Amabhawuza la akhiwa ngabakhi abalesifiso sokuncedisa isigaba njalo akhelwa abaphila lobugoga, abaswelayo kanye lasebekhulile. Ngikhuluma nje amabili sephelile ukwakhiwa kuthi amanye asakhiwa. Ibhawuza yinye ngayinye ithwala amalitha angu-10 000 amanzi ngakho ekwakhiweni kwawo kwakhiwa indlwana ifulelwe ngamazenge ayiwo akhongozela amanzi azangena empompini ewasa ebhawuzeni,” kuchaza uMnu Ngwenya.
Iphephandaba likazulu lenelise njalo ukuxhumana loMnumzana Leonard Moyo omunye wezakhamizi ezakhelwe amabhawuza la wachaza ukuthi ulokujabula okukhulu ngesenzo esenziwa yi Christian Care.
“Ngilokujabula okukhulu ngoncedo esilwenzelwe yinhlanganiso le ngoba khathesi sesizathola amanzi eduzane noma nje besiwakha khatshana kakhulu. Sesilindele ukuthi izulu liqale ukuna ukuze sithole amanzi lula ngakho ngilethemba lokuthi ibhawuza le ingagcwala sizakukha kiyo amanzi kuze kuphela umnyaka ozayo,” kutsho uMnu Moyo.
Ekhuluma lentatheli usobhuku walesisigaba uMnumzana Bornwell Ncube uchaze ukuthi laye uyajabula ngesenzo esenziwa yinhlanganiso le.
“Kule indawo sithwele nzima ngodubo lwamanzi ngakho ngiyathaba ngoba abantu abangenelisiyo ukuhamba umango omude besiyakukha amanzi khathesi sebezakukha eduzane. Noma nje amabhawuza la engakhiwa emizini minye ngaminye kodwa kungcono ngoba awavulekaga kakhulu izikhala okokuthi kakho oba khatshana lamanzi,” kuphetha UMnu Ncube.
Online Reporter