admin
Fairness Moyana
KULENINA elimiswe phambi komthethwandaba weHwange ngecala lokuhlukuluza usane oluleminyaka emibili ngokwehluleka ukukhuluma obekucina kubangela ukuthi luzingcolise.
Umsolwa uJanet Simango (57) umiswe phambi kukamantshi uNkosikazi Portia Mhlanga watholakala elecala lokuhlukuluza usane oluleminyaka emibili ngenxa yokuzingcolisa nxa kumele luye egangeni.
Inkundla izwe ukuba kusukela mhlaka 1 kusiya ku 21 Ncwabakazi kuwonalo umnyaka umsolwa wayeqhatshwe ukuthi akhangele usane lolu.
Kubikwa umsolwa ngesikhathi elalo abazali balo bevakatshile ubelutshaya umzimba wonke ngentambo yegetsi.
Umtshutshisi uchaze ukuthi indlela ayemtshaya ngayo ilakho ukuletha ukuhlukumezeka kumbe ukungahlaliseki kuhle komntwana engqondweni.
Indaba le yavela ngelanga umzawakhe womntwana lo aze abavakatshele. Kuthe ngesikhathi emgezisa wananzelela ukuba umamangala wayegcwele imvivinya lezilonda umzimba wonke.
Lokhu kwabangela ukuthi udaba lwaziswe amapholisa ngemva kokuba umsolwa ehluleke ukuchasisa ukuthi umntwana walimala njani.
Ebuzwa ukuthi kungani wayetshaya umntwana ngale indlela umsolwa umangalise inkundla ngokuthi wayefuna ukumfundisa ukuthi akhulume nxa efuna ukuya ngaphandle.
“Nkosi ngamtshaya ngoba ngangizama ukumfundisa ukuthi akhulume nxa esefuna ukuya esambuzini kulokuthi abelokhu ezingcolisa. Ngicela umthethwandaba kunye labazali bomntwana bangixolele ngesenzo sami,” kutsho umsolwa.
Isikhalazo sakhe kasizange samukelwe ngumantshi uNkkz Mhlanga ngoba emtshele ukuba wehluleke ukuthembeka esele lomamangala.
Umsolwa uvalelwe ejele njalo inkundla izaphinda ithi gwaqa ekupheleni kwayonale iviki ukuze ethulelwe isigwebo sakhe.
Online Reporter