Online Reporter
Nkosilathi Sibanda
KWABA lusuku lwenjabulo, kukholisa abathandi bemigido yesintu kumncintiswano weChibuku Neshamwari koBulawayo ngoMgqibelo.
Injabulo le yengezwa njalo lapho kunqoba iqembu leSekunjalo MaAfrika elethula umgido obizwa ngokuthi “Mzansi”. Umgido lo, ngokutsho kwebizo, ngoweMzansi Africa. Iqembu leli, elizamela isabelo sakoBulawayo kumncintiswano wezabelo mhlaka 19 Ntulikazi eMutare, laba yintshantshu ngo2023.
Lizabe lifika lelibanga lomncintiswano lo okwesine nanko lagida ngo2014, 2016, lango2023. Ekuncintiseni kwayo ngoMgqibelo iSekunjalo MaAfrica inqobe amanye amaqembu atshengise ubugabazi kwezomgido womdabu.
Kunombolo yesibili kube yiSizwe Sabatsha kwalandela iBambanani.
Amanye amaqembu yiThandanani Women’s Ensemble, Iluba Lemvelo, Khami Prison, Mthwakazi KaNdaba, Jaiva Arts Centre, Vuka Mthwakazi le-Ulenje Dance Troupe.
Umqondisi weSekunjalo MaAfrica u-Arnold Ndebele uthe baphindela kusigaba sokucina somncintiswano behlose umvuzo wokuqala.
“Sakwenza ngo2023, sizaphinda lalonyaka. Inkundla zeChibuku Neshamwari sizijwayele njalo sesikwazi ukuthi kumele sisebenze njani ukuze sikhange amehlo ababukeli labehluli. Okumqoka yikuthi siqhubeke silolongela umncintiswano ozayo.
“Sizizwa siphakanyisiwe ukunqoba esabelweni sakoBulawayo. Bekungelula ngoba lamanye amaqembu atshengise ubungcitshi baphezulu. Sibonga wonke umuntu owasekela umsebenzi wethu size sifike lapha esikhona. Njengoba silungiselela ukuya eMutare, sizalungisa lapho esixega khona, ukuze sihambe siqinile. Umvuzo ngowethu,” kutsho uNdebele.
