Sidumisile Mabena
Zvamaida Murwira
IZIZALWANE zakuleli lezeBotswana sezingachapha imingcele kungadingeki amaphasipoti, kodwa zisebenzisa izithupha.
Inhloso yokwenza lokhu yikuthi kubelula ukuhamba kwabantu lokuqinisa ubudlelwano phakathi kwamazwe womabili.
Isivumelwano lesi sivele emhlanganweni we-Fifth Bi-National Commission oqhutshelwe eState House ngoLwesithathu, owakhokhelwa nguMongameli u-Emmerson Mnangagwa loMongameli weBotswana uDuma Gideon Boko.
Ekhuluma emhlanganweni, uMongameli uMnangagwa uthe abantu beZimbabwe leBotswana bayimuli inye.
“Abantu beZimbabwe leBotswana bangabantu bomuli inye. Ubudlelwano bethu bedlula ezombusazwe, busekelwa yimbali yethu, amasiko lokufuna intuthuko,” kutsho yena.
Uthe sekumele kube lula ukuhamba kwabantu, impahla lokuqhutshwa kwamabhizimusi phakathi kwamazwe womabili. Wengeze wathi uhlelo lokusebenzisa izithupha luzaqala kancane kancane, kuqale abantu abahlala emingceleni labahamba isikhathi esifitshane.
UMongameli uBoko uvumelene lomqondo lo, esithi uHulumende wakhe usebenza ekwethuleni izithupha zohlobo lwe-cryptic graphic.
“Sikhangelele ukusebenzisa izithupha ezingafakwa kumafoni, ukuze abantu bangathwali nzima ukuzithwala nxa behamba. Lokhu kuzakwenza kube lula kakhulu ukuhamba kwabantu,” kutsho uBoko.
Online Reporter