Online Reporter
Lovemore Dube
INHLANGANISO yeZimbabwe Olympic Committee (ZOC) iqhuba umhlangano wabadlali ngenhloso yokubabela ulwazi, ukubanika amandla ekuzimeleni lokukhuthaza ubuqotho kwezemidlalo.
Umhlangano lo oqhutshwe ngoLwesibili uhlanganise abamele abadlali abavela emidlalweni ehlukeneyo, njalo inengi labo kube ngabesifazane.
Lonyaka umhlangano lo uqhutshwa ngaphansi kwendikimba ethi: “Ukuphakamisa Abadlali Ngokubamela Ngobuqotho.”
Abakhokheli bomhlangano bethule indaba ezitshiyeneyo ezithinta abadlali, okugoqela indima, imisebenzi lesivumelwano se-Athletes Commission, ukuzwisisa izivumelwano kanye lemithetho yokulwisana lokusetshenziswa kwezidakamizwa emidlalweni.
Umhlangano wakoBulawayo lo uyingxenye yohlelo lweZOC oluqhutshwa elizweni lonke ngenhloso yokuhlangana labadlali kuzo zonke izabelo zelizwe ukuze kuqiniswe inhlalakahle yabadlali kanye lokuba khuthaza umlandu wabo ekuphathweni kwezemidlalo.
Phakathi kwendaba eziqakathekileyo ezixoxwayo kulodaba lokusetshenziswa kwezidakamizwa ezinqatshelwa emidlalweni, oluqhubeka luyingozi emisebenzini yabadlali njalo lusonakalisa isithunzi sabo lemidlalo abaphatheka kiyo.
Kuphinde kwavezwa ukuthi ukusetshenziswa kubi kwezidakamizwa lotshwala kuyinkinga enkulu ebhekane labadlali abanengi, okuvame ukudala ekupheleni masinyane kwemisebenzi yabo kwezemidlalo, ebikhangelelwe ukuba lekusasa elihle.
Abadlali baphinde bakhuthazwa ukuba bazwisise ngcono izivumelwano zabo, ukusebenza alama-agent, lokwazi amalungelo abo.
Inhlanganiso ye-ZOC ithe ilethemba lokuthi ukwanda kolwazi ngendaba ezifana lokumela abadlali, izivumelwano lemithetho yokulwisana lokusetshenziswa kwezidakamizwa kuzanceda abadlali ukuthi benze izinqumo eziqondileyo njalo bavikele ngcono ikusasa labo.
Isiphathamandla seZOC uNewman Gomendo unikeze inkulumo ngokulwisana lokusetshenziswa kwezidakamizwa emidlalweni, efundisa abadlali ngezinto ezingavunyelwayo, indlela yokuhlolwa lokuqakatheka kokugcina ubuqotho.
